20 ноябрьдә Татарстанның Лениногорски районына караган Сарабиккол авылында фәнни-гамәли конференция үтте. Ул гомумән алганда татар тарихы һәм җирле тарих темаларын үз эченә алды. “Лениногорск районында һәм Татарстанның көнъяк-көнчыгышда кеше һәм табигать. Сарабиккол авылы һәм Шөгер-Шушма табигый-географик һәм тарихи-мәдәни төбәк: тарих һәм мәдәният проблемалары” дип аталган бу фәнни чара бөтенроссия статусында оештырылды.

Оештыручылар конференцияне Сарабиккол авылында туып үскән танылган галим Әгъдәс ага Борһановның 95 еллыгына багышладылар. Шулай бу фәнни чара ТАССРның 95 еллыгын, Татарстан Республикасының 25 еллыгын, Лениногорск шәһәренең 60 еллыгын билгеләү һәм Россия Федерациясендә Әдәбият елы кысаларында үтте.