Бөтендөнья татар конгрессы Башкарма комитеты эшчәнлегенең ел йомгакларына багышланган киңәйтелгән утырышын уздырырга тора.

6 декабрь көнне сәгать көндезге 2дән аның 8 комиссиясе утырышы башлана. Аерым алганда, татарлар яшәгән төбәкләрдә эшмәкәрлекне һәм икътисади элемтәләрне үстерү комиссиясе ТР Сәнәгать һәм сәүдә министрлыгында киңәшмә уздыра, татар халкы мәдәнияте һәм рухи мирасы комиссиясе – ТР Мәдәният министрлыгында, милли мәгариф һәм фән комиссиясе – ТР Мәгариф һәм фән министрлыгында, дини берләшмәләрнең эшчәнлеген координацияләү комиссиясе – Россия ислам университетында. Татар этносы үсеше стратегиясе турында сөйләшү Бөтендөнья татар конгрессы Башкарма комитетында үткәрелә, тагын өчесе “Казан” милли мәдәният үзәгендә була: халыкара мөнәсәбәтләр һәм кеше хокуклары – 102 нче бүлмәдә, Бөтендөнья татар яшьләре форумы бюросы утырышы – киноконцертлар залында, массакүләм мәгълүмат чаралары – күргәзмәләр залында.

Әлеге чарага 300дән артык кеше чакырылган булып, БТК БКның мәгълүмат-аналитика идарәсе җитәкчесе Гөлназ Шәйхи сүзләренчә, утырышлар соңында аларның К.Тинчурин исемендәге Татар дәүләт драма һәм комедия театрында Татарстанның халык, Россиянең атказанган артисты Исламия Мәхмүтованың иҗат кичәсенә бару мөмкинлеге каралган.

7 декабрь – шимбә көнне сәгать 10нан әлеге халыкара милли оешманың 2013 елдагы эшчәнлегенә йомгак ясала, киләсе елга эш планы карала. Киңәйтелгән утырышны, төшке ашка 1,5 сәгать тәнәфес белән, кичке 6 нчы яртыга кадәр уздыру планлаштырылган.