Бүген Бөтендөнья татар конгрессында Башкортстан Республикасы татар студентлары делегациясе Башкарма комитет җитәкчелеге белән очрашты.

Очрашуга Башкортстан Республикасында югары уку йортларында, педагогия көллиятендә белем алучы яшьләр, авылларда эшмәкәрлек белән шөгыльләнүче милләттәшләребез килде.

Студентлар делегациясен Бөтендөнья татар конгрессы Башкарма комитеты җитәкчесе урынбасары Илгиз Халиков сәламләде. Ул яшьләргә Бөтендөнья татар конгрессы структурасы, аның тарихы һәм биредә эшләп килүче проектлар хакында мәгълүмат бирде. Татар конгрессының югары уку йортларына керүдә булышлык күрсәтү проектларының студентлар өчен аеруча кызыклы булуын ассызыклады.

Шулай ук ул Илгиз Халиков очрашуда катнашучыларга Милләт Җыенында кабул ителгән “Татарлар: гамәл стратегиясе” документы һәм аны тормышка ашыру юллары хакында сөйләде.

Яшьләр өчен эшләп килгән проектлар хакында Татар яшьләре белән эшләү комитеты җитәкчесе, Бөтендөнья Татар конгрессы Башкарма комитеты каршындагы Бөтендөнья Татар яшьләре форумы рәисе Ленария Мөслимова сөйләде. Ул студентларны “Печән базары”, “Ачык университет”, “Мин татарча сөйләшәм”, “Татарча диктант”, “Җәдид фест” һ.б. проектлар эшчәнлеге белән таныштырды һәм аларда актив катнашырга чакырды.