“Татар табыны” конкурсы 7 нче октябрьдә башланган иде. Бүген ул төгәлләнә. Шушы вакыт эчендә хуҗабикәләребез бик актив булды. Араларында көн саен берсеннән-берсе тәмлерәк ризыкларын пешереп инстаграм, вконтакте битләренә куеп баручылар да бар иде. Нинди уңган, булган, тырыш безнең хатын-кызларыбыз. Конкурс тәмамланса да, #татартабыны2019 хештегы белән кереп, андагы рецептлардан һәркем файдалана ала. Катнашучыларның барсына да зур рәхмәтебезне белдерәбез.

Ә алга таба нәрсә булачак соң? Оештыручылар 15 финалистны сайлап ала. Финалистларның эшләре 11 нче ноябрьдә иртәнге сәгать 9 да сайтка куела. Алар арасыннан җиңүчеләр тавыш бирү юлы телән билгеләнә. Тавыш бирү 18 нче ноябрьдә иртәнге сәгать 9 да туктатыла. Ә Гран-при иясен финалистлар арасыннан оештыручылар сайлый.

Гран-при иясе конкурска нәтиҗәләр ясау һәм бүләкләү тантанасында декабрь башында игълан ителә. Ул Россия төбәкләреннән җыелган татар журналистлары өчен оештырылган чара кысаларында үтәчәк. Аның вакыты оештыручылар тарафыннан аерым хәбәр ителә.