enrutat
Баш бит / Минтимер Шәймиев Төбәк һәм милли мәгълүмат чаралары форумы катнашучыларына: «Безнең үз кырыбыз бар һәм бу өстенлегебез»
Минтимер Шәймиев Төбәк һәм милли мәгълүмат чаралары форумы катнашучыларына: «Безнең үз кырыбыз бар һәм бу өстенлегебез»

Минтимер Шәймиев Төбәк һәм милли мәгълүмат чаралары форумы катнашучыларына: «Безнең үз кырыбыз бар һәм бу өстенлегебез»

Бу көннәрдә Казанда Төбәк һәм милли мәгълүмат чаралары форумы үтә. Әлеге чара быел инде җиденче тапкыр оештырыла һәм бу юлы ул Россиянең 19 төбәгеннән 200дән артык делегатны җыйган. Төбәк һәм милли матбугат язмышына битараф булмаган, аның киләчәге өчен кайгырган журналистлар һәм хакимият вәкилләре бер мәйданга җыелып, бу өлкәдәге вәзгыять турында cөйләшә, тәҗрибә уртаклаша, үсеш перспективаларын билгели.

Форум уздыру мәйданы итеп юкка гына Татарстан сайланмаган. Республикабызда бүгенге көндә 963 массакүләм мәгълүмат чарасы эшли, рус һәм татар телләрендә генә түгел, удмурт, чуваш телләрендә дә басмалар чыга, керәшеннәрнең үз газеталары бар, милли темаларны яктырткан тапшырулар да дөнья күрә. Һәр Татарстанның, һичшиксез, бу тармакта лидерларның берсе буларак, әйтер сүзләре бар.

Форумга югары статусны чараның пленар утырышында Татарстан Республикасы Дәүләт киңәшчесе Минтимер Шәймиев бирде. Төп доклад белән чыгыш ясап, ул төбәк һәм милли матбугат чараларының ролен, максатларын билгеләде.

  • Татарстан территориясендә Форум беренче тапкыр гына узмый. Төбәк һәм милли ММЧлары дәүләт һәм муниципаль хакимиятне барлык дәрәҗәләрен колачлап, Россиядә милли сәясәтнең үзәгендә булырга тиеш. Шуңа күрә хезмәттәшлексез заманча шартларда журналистлар корпусының бурычларын тормышка ашыру мөмкин түгел. Заманча мәгълүмати киңлекнең масштабларын һәм мөмкинлекләрен исәпкә алып, сүзеңне ишеттерә белү, югалып калмау җиңел бурыч түгел. Моны талантлы, кыю, үз эшенә тугры массакүләм мәгълүмат чаралары вәкилләре генә гамәлгә ашыра ала. Безнең үз кырыбыз бар, без аны эшкәртә беләбез һәм яхшы гына уңыш алабыз, һәм бу безнең өстенлегебез. Үз тамырларыбызга якын булу, кешеләрне, аларның традицияләрен белү, аларның хезмәтенә хөрмәт, сезнең иҗади илһам чыганагы булырга тиеш, — дип белдерде Татарстанның беренче Президенты.

Минтимер Шәймиев билгеләп узганча, республикада 963 ММЧ теркәлгәнен, аларның 560ы — басма матбугат, 193е электрон форматта, 105 радиоканал, 91 телеканал, 13 мәгълүмати агентлык эшли. Рус телендә 280 газета һәм 105 журнал басылса, татар телендә 146 газета һәм 56 журнал дөнья күрә.

“Татарстан почтасы” мәгълүматлары буенча, үзәк, республика, шәһәр һәм район басмаларына 2018 елның икенче ярты еллыгына язылу буенча гомуми тираж 1 млн 200 мең экземпляр.  100 кешегә 302 экземпляр туры килә, Россиядә бу күрсәткеч 93 экземпляр. Димәк, Татарстан бүген дә иң күп укый торган төбәкләр рәтендә кала.

Фикер калдырырга

Обязательные поля отмечены *

*