tatruen
Баш бит / Яңалыклар / “Моның нәрсәсе гаҗәп?” Быел татар теленнән бердәм дәүләт имтиханын 18 кеше тапшырган
“Моның нәрсәсе гаҗәп?” Быел татар теленнән бердәм дәүләт имтиханын 18 кеше тапшырган

“Моның нәрсәсе гаҗәп?” Быел татар теленнән бердәм дәүләт имтиханын 18 кеше тапшырган

Татар телендә укып, БДИда югары нәтиҗә күрсәт­кән Рамил Баһавиев турында бөтен республика ишетте. Телнең имтиханнар тапшырганда комачау итмәвен башкалар да дәлилләде. Бармак белән генә санарлык булса да, Татарстанда мәктәпне тәмамлаучылар арасында татар теленнән бердәм рес­публика имтиханын тапшыручылар бар икән әле. Быел алар – 18 кеше.

Әлмәттәге Ризаэддин Фәх­­ретдин исемендәге 1 нче гимназияне тәмамлаган Әдилә Закирова – шул кыю­ларның берсе. “Татар те­лен­нән имтихан тапшыручы бөтен Әлмәт районына берүзем булдым. Бу фәннән имтихан мин керәсе уку йортына кирәкмәсә дә, аны үз теләгем белән тапшырдым”, – ди ул.

Имтихан тапшырганда, гадәттә, бер бүлмәгә 15ләп баланы туплыйлар. Әдиләгә исә иптәшкә кеше булмый: аудиториядә берүзе генә утыра ул. Имтихан тапшырган көнен ул болай искә ала:

– Башыма төрле уйлар кил­де. Шул мәлдә ана теле­безнең хәле шәптән түгел икәнен аңладым, татар те­ленең киләчәге турында уйландым. Әлмәт кебек зур җир­лектән дә бер мин генә имтихан тапшырдым бит! Эш районда гына да түгел. Мондый хәл Татарстан кү­лә­мен­дә күзәтелә. Инде бер­дәм дәүләт имтиханы артта калды. Татар те­леннән имтихан тапшыручылар булган икән… Ә без булмасак, татар телен­нән имтиханны берәү дә бирмәс иде бит! Без, аз булсак та, ярый әле булганбыз.

Имтиханга ничек әзер­ләнгән соң? Үзе: “Әзерлән­мәдем дә!” – ди. Аның каравы татар теле һәм әдәбия­тыннан олимпиадага нык­лап әзерләнгән икән. Мондый төр бәйгеләрдә үзен еш сынаган кыз. Интернет-олимпиадаларда катнашкан, урыннар яулаган.

– Бердәм дәүләт имтиханы шушы олимпиадалардан да катлаулырак булмастыр, дип уйладым. Ялгышмадым кебек. Имтихан өчен тыныч идем, – дип сөй­ләде Әдилә. – Укытучым мине күбрәк рухи яктан әзер­ләде. Ул миңа үземә ышанырга кушты.

Кызның татар теленнән имтихан тапшырасын бе­л­гәч, күпләр: “Аннан имтихан бирергә ярыймыни? Татар телен дә биреп буламыни?” – дип гаҗәпләнә торган булганнар икән әле. “Барысы шакката, шул ук вакытта соклана да иде. Шундый хәлгә җиттекмени инде? Ә бәлки, имтихан тапшыру мөмкинлеге барлыгын бел­мәгәнгә күрә, аны бирми­ләрдер дә? Татарстанда мо­ның шулкадәр яңалык булуы гаҗәпләндерде мине. Татар теленнән имтихан бирүнең гадәти күренеш икәнен аңлатырга теләдем. Ул да бит – гадәти имтихан. Гаҗәпләнерлек нәрсә дә юк лабаса”, – ди Әдилә. Якын кешеләре исә теләгенә каршы төшмәгән. Имтихан нә­тиҗәләренә килгәндә, Әди­лә татар теленнән – 80, урыс әдәбиятыннан – 97, урыс те­леннән – 91, ә җәмгыять бе­леменнән 77 балл туплаган.

Әдилә тәмамлаган мәк­тәп Әлмәттә бердәнбер мил­ли уку-укыту үзәге санала икән. Фәннәр элек ике телдә укытылган, Әдилә үзе дә математика кебек төгәл фәнне татарча укып өй­рәнгән. “Дә­ресләр тулысын­ча урыс те­лендә генә бармый, татар телендә аралашу да югалмады. Чаралар татар телендә уза”, – диде Әдилә.

Әдилә Закирова – булачак хезмәттәшебез дә әле. Ул киләчәген журналистика белән бәйләргә тели. Быел ул, “Әйдә ТНВга!” бәйгесен­дә катнашып, Гран-при яулады. Инде КФУдагы эчке имтиханнары да башланып киткән. Киләчәктә телеви­де­ниедә эшләргә исәбе.

Чулпан Гарифуллина

vatantat.ru

Фикер калдырырга

Обязательные поля отмечены *

*