Сукырлар һәм начар күрүчеләр өчен республика китапханәсенең нәшрият комплексында Брайль шрифтында «Татар халык киемнәре» китабы дөнья күрде.
Китап «Татарстан 3D форматында бармак очларында» проекты кысаларында дөнья күрде.
Халык киеме – милли киемнәрнең иң ачык һәм үзенчәлекле билгесе. Татар киеменең күп гасырлык тарихы, ачык сәнгать теле, халыкның эстетик идеалларын чагылдыручы кабатланмас стиле бар.
Китап күрмәүчеләр һәм начар күрүчеләрне XIX гасыр уртасы – XX гасыр башы татарларының традицион киеме белән үтемле форматта таныштыра.
Басма белгечләр өчен дә, киң даирә укучылар өчен дә кызыклы һәм файдалы булачак. Моннан тыш, үзешчән сәнгать коллективлары һәм анда катнашучылар басманы сәхнә киемнәре сайлау һәм әзерләүдә гамәли кулланма буларак куллана алалар.
