enrutat
Баш бит / Төмән өлкәсе Сабан туе Санниковода гөрләде
Төмән өлкәсе Сабан туе Санниковода гөрләде

Төмән өлкәсе Сабан туе Санниковода гөрләде

Өлкә Сабан туе 13 нче июль көнне Тубыл районының Санниково авылы тирәсендәге аланлыкта узды. Ул иртәнге 11дә ат чабышы белән башланды. Бәйрәм итәргә килгән кунакларны аллы-гөлле бизәлгән зур мәйдан каршы алды. Бәйрәмнең тантаналы өлешендә борынгыдан килгән гореф-гадәтләрне саклап, аларны буыннан-буынга җиткерү максаты белән Тубыл район мәдәният үзәге гаилә темасына театральләштерелгән тамаша тәкъдим итте.

Аннары сәхнәгә хөрмәтле кунакларны чакырдылар. Вице-губернатор Сергей Сарычев өлкә губернаторы Александр Моорның сәламнәрен җиткереп, милләтебезнең үзаңын үстерүдә, мәдәниятебезне, телебезне саклауда, тарихыбызны югалтмауда өлкәдә нинди эшләр башкарылганы турында сөйләп, якташларын бәйрәм белән котлады.

Аның сүзләренә өлкә Думасы депутатлары Владимир Майер, Юрий Конев, Тубыл районы хакимият башлыгы Юрий Батт, өлкә татар милли-мәдәни автономиясе рәисе Ришад Зиганшин, өлкә татар Конгрессы вәкиле, профессор Хәнисә Алишина, Тубыл районы татар милли-мәдәни автономиясе рәисе Ринат Урамаев та кушылдылар.

Бәйрәмгә фатиха биреп Тубыл шәһәре мәчете имамы Ибраһим хәзрәт Сухов Коръән укыды. Ниһаять, тантаналы өлештән соң, бәйрәмнең иң кызыгы, җанлы өлеше  башланды. Кунаклар мәйдан тирәли урнашкан милли аш-сулы, кунакчыл милли йортларда булып, аларның ризыкларын татып, җыр-биюләрен, гореф-гадәтләрен карап, танышып чыктылар. Кунаклар ат ярышларын, төрле спорт уеннарын, уен-аттракционнарны яратып карадылар.

Елдагыча, сәүдә нокталары гөрләп эшләп торды. Халык Сабантуйның төп уеннары — колгага менү, капчык белән сугышу, аркан тартышу, гер күтәрү, көрәш һәм башка ярышларда бик теләп катнашты. Җитезләр, көчлеләр, өлгерләр җиңүгә ирештеләр. Көн бик кызу булу сәбәпле, кайбер кунаклар иртәрәк кайту юлын карадылар. Әмма төп сәхнәдән җыр-моң тавышы, җиңүчеләрне игълан итеп, бүләкләр тапшырулар кичке сәгать 6га хәтле дәвам итте.

yanarish72.ru

Фикер калдырырга

Обязательные поля отмечены *

*