Шомыршы муниципаль округының Байтирәк авылында тарихи һәм шатлыклы вакыйга булды. Нәкъ 25 ел элек биредә мәчет ишекләрен ачкан, ул авыл халкы өчен яктылык, белем һәм рухи таяныч чыганагына әверелгән.
Тантаналы җыелыш Коръән укудан башланды. Әлеге мактаулы миссияне Чувашия Республикасы мөфтие Ильяс хәзрәт Сафиянов башкарды.
Мөфти үзенең чыгышында мәхәллә кешеләрен бу истәлекле вакыйга белән котлады, буыннар арасындагы аерылгысыз бәйләнешне һәм Чувашиядә гореф-гадәтләрне саклауның мөһимлеген ассызыклап Мәскәү мөфтие, Россия мөселманнары Диния нәзарәте башлыгы Әлбир хәзрәт Кргановның сәламләү сүзләрен җиткерде.
Ильяс хәзрәт Сафиянов билгеләп үткәнчә: «Мәчет өчен 25 ел – ул бер гомер. Бу стеналар меңләгән догаларны, никах шатлыгын һәм саубуллашу күз яшьләрен хәтерли. Байтирәкнең төп байлыгы – матур бина гына түгел, ә саклап кала алган ныклы җәмәгать — Аллаһы Тәгалә бу йортны киләчәктә дә яктылык белән, ә безнең йөрәкләрне туганнарча мәхәббәт һәм тынычлык белән тутырсын. Монда акыллы аксакалларны да, яшь мөселманнарны да күрү – безнең киләчәгебезнең нигезе».
Бу көнне ихлас күңелдән шушы игелекле өлкәдә көн саен хезмәт куйган кешегә рәхмәт сүзләре яңгырады. Чувашия мөселманнары Диния нәзарәте һәм барлык мәхәллә кешеләре исеменнән имам-хатыйб Феяз хәзрәт Чумаровка зур рәхмәтләр җикерделәр. Аның армый-талмый хезмәте, зирәк остазлыгы һәм ихлас хезмәте мәчеткә һәрвакыт кайтырга теләгән урынга әйләндерә. Аллаһы Тәгалә Феяз хәзрәтнең бөтен тырышлыгын кабул итсен!
Юбилей бик күп мәртәбәле кунакларны җыйды, алар бәйрәмнең бизәге булды. 90 яшьлек имам-хатыйб Гарәфетдин хәзрәтнең монда булуы аеруча дулкынландыргыч вакыйга булды. Аның тормыш юлы барыбыз өчен дә ныклык һәм тирән ышаныч үрнәге булып тора.
Шулай ук тантанада: территориаль бүлек башлыгы Фәннур Рәхмәтуллов, Озын Куак авылы имам-хатыйбы Әмир хәзрәт Алеев, Кызыл Камыш авылы имам-хатыйбы Ришат хәзрәт, Татар Согыты авылы имам-хатыйбы Сәйфулла хәзрәт, Чувашия мөселманнары Диния нәзарәте рәисе ярдәмчесе Илдус Зәйнетдинов, «Гөлестан» мәдрәсәсе директоры Әхәд Салихов катнашты.
Һәм, әлбәттә, бу бәйрәмне күпсанлы мәхәллә халкыннан башка күз алдына да китереп булмый, алар мәчетне үзләренең күңел җылысы белән тутырдылар.
Байтирәк авылы мәчете әле күп гасырлар дәвамында әхлак һәм иман сагында торсын, ә аның диварларында һәрвакыт диндарлыкка өндәүче азан яңгырасын!
Чыганак: Чувашиянең “Вакыт” гәзите
