Казанда «Том Сойер Фест» волонтерлары Столяров урамындагы 37 нче йортны торгызуга керештеләр. Төзекләндерү эшләрендә 20дән артык кеше катнаша.
Реставраторлар җитәкчелегендә активистлар фасадны чистарталар һәм бинаны алга таба торгызуга әзерлиләр.
Билгеле булганча, бу бинаны XX гасырның беренче яртысында традицион татар стилендә төзегәннәр. Кайчандыр ул Столяров урамының төп бизәкләренең берсе саналган.
Хәзерге вакытта бинаның фасадын торгызуның беренче этабы бара. Казанның тарихи мирасын саклауга теләгән һәркем кушыла ала.
