4 июльдә Мордовия Республикасының Ләмбрә районы Аксён авылында Республика Сабан туе узачак. Быелгы чара аеруча әһәмиятле булыр дип көтелә: анда Мордовия Республикасы Башлыгы Артем Здунов һәм Татарстан Республикасы Рәисе Рөстәм Миңнехановның катнашуы планлаштырыла.

Бәйрәмне оештыру өчен Бөтендөнья татар конгрессы Башкарма комитеты һәм Татарстан Республикасының Нурлат районы җаваплы. Бүген Бөтендөнья татар конгрессы һәм Нурлат районы администрациясе вәкилләре командасы, Башкарма комитет җитәкчесе Данис Шакиров җитәкчелегендә, Сабантуй узачак мәйданны карады, соңгы әзерлек эшләре белән танышты, мәчеткә, мәдәният йортына һәм Хәрби хәрәкәтләр сугышчылары һәйкәленә барды.

Тантаналы чаралар иртәгә иртән башлана. Сәгать 10:00дә ТР Рәисе Аксёнга киләчәк. Аны Мордовия Республикасы Башлыгы Артём Здунов һәм Татарстан Премьер-министры урынбасары, Бөтендөнья татар конгрессының Милли Шура рәисе Васил Шәйхразыев каршы алачак.

Аннары рәсми затлар Сугышта һәлак булучылар истәлегенә куелган һәйкәлгә чәчәкләр салачак, шулай ук авылдагы мәдәният йортын һәм мәчетне караячак.

12:00 сәгатьтә Сабантуйны ачу тантанасы башланачак. Бәйрәмдә ат чабышлары һәм милли көрәш буенча ярышлар планлаштырылган. Шулай ук бай концерт программасы, милли уеннар, күргәзмәләр, сату нокталары, милли утарлар эшчәнлеге дә каралган.

Бәйрәм берничә мең тамашачы җыяр, ике тугандаш республика арасында дуслык һәм мәдәни алмашуның якты символы булыр дип көтелә.