Бүген Үзәк шәһәр китапханәсендә Омск өлкәсе татарлары тормышында үзләренең лаеклы эзләрен калдырган гаиләләр белән җылы һәм эчтәлекле очрашу узды. Чара узган Гаилә көненә багышлап, «Татар дөньясы» газетасының редакция коллегиясе тарафыннан оештырылды.

Очрашуда катнашкан кунаклар үзләренең гаилә тарихлары белән уртаклаштылар, тормыш юлларында очраган шатлыклар һәм сынаулар турында сөйләделәр. Алар күп еллар дәвамында бер-берсенә терәк булып, аңлашып һәм ярдәмләшеп яшәү серләре белән бүлештеләр.

Чарада Мөхәммәдуллиннар, Шугуровлар һәм Кучуковлар гаиләләре катнашты. Алар үзләренең нәсел тарихлары, гаилә традицияләре һәм буыннан-буынга тапшырылып килгән кыйммәтләре турында сөйләделәр. Аларның тормыш юллары яшь буын өчен матур үрнәк булып тора. Бу гаиләләр мәхәббәт, хөрмәт, сабырлык һәм үзара ярдәмнең ныклы гаилә нигезе булуын тагын бер кат расладылар.

Очрашуның хөрмәтле кунакларының берсе — Куандыков Дармен Мурат улы, Себер Җәмигъ мәчетенең имам-хатыйбы булды. Ул Коръән аятьләре укып, дога кылды һәм гаилә кыйммәтләре, ата-анага хөрмәт, балаларны дөрес тәрбияләү турында эчтәлекле вәгазь сөйләде.

Аның фикерләре белән 50 елдан артык иңгә-иң куеп гомер иткән гаиләләр дә килештеләр. Алар яшь чакларында кызның яки егетнең матди хәленә түгел, ә хезмәт сөючәнлегенә, әдәплелегенә, намуслылыгына һәм кешелекле булуына күбрәк игътибар бирелүен билгеләп үттеләр. Нәкъ менә шушы сыйфатлар ныклы һәм бәхетле гаилә коруның нигезе булып хезмәт иткән.

Чара барышында гаилә традицияләрен саклау, милли мәдәниятне һәм туган телне киләчәк буыннарга тапшыру мәсьәләләре дә күтәрелде. Катнашучылар үзләренең истәлекләре белән уртаклашып, бу кыйммәтләрнең әһәмиятен ассызыкладылар.

Барлык кунаклар да бер фикердә булдылар: гаилә — кешенең иң зур байлыгы, ышанычлы терәге һәм ныклы таянычы. Гаиләдә мәхәббәт, хөрмәт, сабырлык һәм үзара аңлашу булган очракта гына бәхетле тормыш төзеп була. Шуңа күрә якын кешеләрне кадерләргә, бер-береңә ярдәм итәргә һәм мәхәббәт бүләк итәргә кирәк.

Очрашу бик җылы һәм ихлас атмосферада узды, һәркемнең күңелендә матур тәэсирләр һәм якты истәлекләр калдырды.