Бүген Омскидагы XXVI Федераль Сабантуй бәйрәме тантаналы пролог белән ачылды. Театральләштерелгән тамашада Татарстаннан килгән сәнгать осталары һәм Омск өлкәсе иҗат коллективлары катнашты. Пролог тамашачыларны татар халкының бай тарихы, гореф-гадәтләре, туган җиргә мәхәббәте һәм Себер җирлегендә төрле халыкларның үзара дус булып яшәве белән таныштырды. Хореографик һәм вокаль композицияләр тамашачыларга онытылмас хис-тойгылар бүләк итте. Бу искиткеч тамашаны рәсми затлар һәм меңнәрчә бәйрәм кунаклары зур соклану белән күзәттеләр.
Белешмә: Борын-борынгыдан татарлар яшәгән Себернең Омск төбәгендә, Иртыш һәм Ишим елгалары буенда бик күп татар авыллары урнашкан. Алар арасыннан бай тарихлы Әшеван авылы быел үзенең 800 еллыгын билгеләп үтә. XXVI Федераль Сабантуйның шушы күркәм датага туры килүе дә тирән мәгънәгә ия. Әшеванның юбилеен билгеләп үтү кысаларында исә Габдулла Тукайның тууына 140 ел тулу уңаеннан бөек шагыйребез һәйкәле ачылачак.
