Татарстан Республикасы Рәисе Рөстәм Миңнеханов Мордовия Башлыгы Артем Здунов белән бергә Татарстанның Нурлат муниципаль районының Татар ишегалдында , шулай ук Мордовия Республикасының Ләмбрә районы ишегалдында булдылар, анда аларга милли гореф-гадәтләрен күрсәттеләр.

«Күпмилләтле Сабантуй» мәйданчыгында Нурлатлылар татар мәдәнияте элементларын күрсәтәләр. Кунаклар милли ризыклардан авыз итә ала. Мастер-класслар оештырылган. Осталар милли курчаклар, сувенирлар ясау буенча дәресләр үткәрәләр. Кунаклар татар милли йолалары, Сабантуйны бәйрәм итүнең үзенчәлекләре һәм татар авылының көнкүреше белән танышалар.  Иҗат коллективларының чыгышларын карый алалар.

Исегезгә төшерәбез, 2023 елда Мордовиядә узган XVI Республика Сабантуенда да Нурлатлылар катнашкан иде. Мәйданчыкның үзәген нурлы Нурлат аты рәвешендәге топиарий бизәде, кунаклар аның янында фотога төшә алдылар. Нурлат кызлары чәкчәк һәм икмәк белән сыйладылар, милли түбәтәйләр бүләк иттеләр.

Мондый ишегаллары -Сабантуйның мөһим өлеше, алар мәдәни күптөрлелекне саклап калырга һәм күрсәтергә ярдәм итәләр.

Белешмә: Мордовиядә 50дән артык татар авылы бар. Өч иҗтимагый оешма эшли. «Якташлар» татарларның төбәк милли-мәдәни автономиясе 1991 елда оештырылган. Әлеге оешманың максаты-татар халкының үзенчәлеген саклау, мәдәниятне, гореф-гадәтләрне үстерү, төрле мәдәни-массакүләм чаралар үткәрү.