Төп татар бәйрәме — Республика Сабантуе алдыннан Мордовия Республикасы Аксён авылында Татарстан Республикасы Рәисе Рөстәм Миңнеханов, Мордовия Республикасы Башлыгы Артём Здунов, шулай ук ТР Премьер-министры урынбасары, Бөтендөнья татар конгрессы Милли шурасы рәисе Васил Шәйхразыев мәчеткә килде.

Аксён авылы мәчете — җирлекнең архитектура доминанты һәм рухи үзәге. Делегация 2011 елда оригиналь проект буенча төзелгән заманча бинаны карады. Мәчет манарасының биеклеге 50 метр тәшкил итә, ә үзе ачык көрән, куе көрән һәм зөбәрҗәт-яшел төсләрдә башкарылган.

Бу монументаль ансамбльне булдыру «Юлдаш» крестьян-фермер хуҗалыгы җитәкчесе, меценат Рафик Фәтхуллов ярдәме белән мөмкин булды. Мәчет тирәсендә территорияне төзекләндерү эшләре бара һәм ансамбльнең тулы күренешен формалаштыручы янкорма корылмалар торгызыла.

Белешмә: Аксён авылы мәчете — ул гыйбадәт урыны гына түгел, ә мөһим мәдәни объект та. Бина 2011 елда меценат акчасына төзелгән. Манара биеклеге — 50 метр. Җәмгыять рәисе — Рафаэль Азисов, имам-хатыйб — Исхак Әширов.