Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев Казахстанга эш сәфәре кысаларында Петропавловск шәһәренә бара.
Биредә Сабантуй уздыру мәйданчыгын карау, әзерлек барышын тикшерү, милли бәйрәмгә әзерлек буенча оештыру комитеты утырышын уздыру каралган. Анда бәйрәм программасы, әзерлек мәсьәләләре буенча сөйләшүләр, фикер алышулар көтелә.
Шулай ук сәфәр программасына бөек шагыйрь Габдулла Тукай бюстын ачу тантанасында катнашу кертелгән. Петропавловскидагы борынгы “Дин-Мөхәммәд” мәчетендә, Магжан Жумабаев Үзәгендә булу каралган. Татарстан Республикасы Рәисе Рөстәм Миңнехановның Төньяк Казахстан өлкәсе Хакиме Гауез Нурмухамбетов белән очрашуы күзаллана. Татарстан Республикасы Рәисе Рөстәм Миңнеханов, Бөтендөнья татар конгрессының Милли Шура рәисе Васил Шәйхразыев Петропавловскида узачак Республика Сабантуенда катнашачаклар.
Белешмә: Петропавловск шәһәрендә быел Казахстанның Республикакүләм Сабантуе оештырылачак. Бәйрәм 25-26 июльдә узачак. Анда Казахстанның барлык өлкәләреннән дә милләттәшләребез катнашыр дип көтелә. Татарстаннан әлеге Сабантуйны үткәрү өчен җаваплы итеп Минзәлә районы билгеләнгән.
