Сигез йөз ел – күпме бу, азмы? Төрле мәдәниятле халык яшәгән төбәк турында гына уйласаң, бу күп тә түгел кебек. Кабер ташларына карап кына бу еллар турында язсаң, әле аңа кадәр дә кеше яшәгән­дер бу җирләрдә дигән уйлар да башка килә. Тарихы гаҗәеп бу авылның.

Табигый, авылның төп байлыгы – гади, киң күңел­ле, тырыш һәм хезмәт сөю­чән кешеләре. Күренекле шә­хес­ләр­дән Советлар Союзы Герое Хәбибулла Нә­биулла улы Хәйруллин, ге­нерал-майор Зәки Йосыф улы Котлин, хәр­би бурычын үтәгән­дә Әфганс­танда һә­лак булган Фәрит Галимҗан улы Шәй­дуллин шушында туган. Бөек Ватан сугышы кырында 93 авылдаш ятып калган.

Күптән түгел Коры Көр­нәле авылының 800 еллык бәйрәме билгеләп үтел­де. Күп еллар югары вазифаларда эшләгән Зиннур Бә­широв бәйрәмне оештыруны башлап йөрүче булды. Мәдә­ният йортында мил­ли моңнар ише­телә. Фойеда – күргәз­мәләр. Алар­да авыл та­рихы, ха­лыкның кул эш­лә­ре.

Күптән бер-берләрен күр­­мәгәннәр күрешә, ко­чак­лаша, хәл-әхвәл сораша. Бер-бер­лә­рен танымый торучылар да бар.

Бәйрәмне күп еллардан бир­ле авыл мәдәниятен үсте­рүгә зур өлеш керткән мәдә­ният йорты җитәкчесе Дил­бәр Казакова ачып җи­бәрде. Авыл җирлеге башлыгы Хә­мит Медведев та кайткан кунакларны, авыл халкын бәй­рәм белән котлады. “Алтын ай” коллек­тивы, гармунга кушылып, “Көр­­нә­ле” җырын җыр­ла­ды.

Бәйрәмне район башлыгы урынбасары Николай Чурин дәвам итте. Ул шушы елларда Көрнәле тарихында эз калдырган кешеләргә рай­он администрациясе баш­лыгы исеменнән мактау кәгазь­ләре тапшырды.

Башкалабыздан килгән галим, “Коры Көрнәле тарихы” китабы авторы Илһам Гомәров чыгышын да халык зур игътибар белән тың­лады. Театраль­ләште­рел­гән тамаша мәдәният йортына җыел­ган бар халыкны шаккатырды. Коры Көрнәле авылының килеп чыгуы турында риваятьне Дилбәр Казакова (авторы) һәм Кр. Баран авылы клуб мөдире Володя Анисимов сәхнә­ләш­терде. Уракчы кызлар биюе, яшьләр җыр­лары, кич­ке уеннар аулак өй күренеш­ләре белән үрелеп барды. Авыл мәдәният йорты үзеш­чән артистларының чыгышын караганда күбе­се­нең күзләре яшьләнде. Мә­дә­ният йорты залына гына сый­мыйча, фойеда да урын алган халык гөрләтеп кул чапты. Казаннан килгән мәртәбәле артистларны да халык рәхәтлә­неп тыңлады.

Утыз елдан артык гомерен мәктәпкә, балаларга багышлаган укытучы, тарихчы, Көрнәле музеена нигез салучы, авыл тарихын өйрә­нүче, чыгарылган китапка бик күп мәгълүмат бирүче Коры Көр­нәле кызы Резедә Фатыйхова халыкны авыл тарихына кагылышлы бик күп кызыклы материал белән таныштырды.

Читкә киткән авылдашлар туган якны сагынып кайталар, социаль челтәр­ләрдә аралашалар. “ВКон­такте“­да “Туган авылым” төр­кемен төзү­че Көрнәле кызы Гөлфинә Вәлиуллина-Гусева авыл тор­мышы бе­лән даими кызыксынып тора. Төркемдә Көрнәлегә багышланган клиплар, фото­сурәтләр, җырлар куелып барыла, кешеләре турында языла. Гөлфинә ханым үзе дә чыгыш ясады һәм мә­дәният йортына элеккеге укытучылар коллекти­вы­ның зурайтылган фотосу­рәтен бүләк итте. Озак еллар район мәдәният йортында эшләүче Гөлфәния Казилова, “Көрнәле егетлә­ре” ансамбле чыгышлары да халык күңеленә хуш килде.

Сигез гасыр вакыт эчен­дә нинди генә вакыйга булмаган, кемнәр генә яшәмә­гән авылда… Хәзергесе көн­­дә 120 хуҗалык бар. Алар арасында әби-ба­ба­лары борынгыдан гомер кичергән­нәр генә түгел, Көрнәле авылы табигатенә гашыйк җаннар – ераклардан кү­ченеп кайтучылар да бар.

Яшь гаиләләрдә балалар үсә. Үсмер егетләр авылны ярата, башка җиргә чыгып ки­тәселәре килми. Җәй көне авыл урамнары әбиләренә кунакка кайткан балалар тавышына тула.

Көрнәленең иң калку урынында кешеләргә иман, нур сибүче көмеш манаралы мәчет салынган. Һәр көн­не аннан моңлы азан яң­гырый, авылның яше-карты мәчеттә намаз укый, вәгазь тыңлый.

Авыл кешеләре белән матур. Бүген 337 кеше яши биредә. Авылдашларны бер­ләштергән урыннар бихисап. Табигать кочагында Тигәнәле буасы, Елга буе, Сабантуй мәйданы һәм мә­дәният йорты. Көрнәле халкы ялт иттереп эшли дә, гөр­ләтеп бәйрәм дә итә белә.

Бәйрәмгә әзерләнү чорында яңартылган юллар, мә­дә­ни­ят йорты янында үткә­релгән төзекләндерү эшлә­ре өчен авыл халкы әле дә Алексеевск районы ха­кимиятенә рәхмәт укый. Бәйрәмне оештыручыларга, башлап йөрү­челәргә дә бик күп җылы сүз­ләр, ихлас теләкләр ишетү насыйп булды ул көннәрдә. Табигый, рәхмәтнең иң зурысы туган туфракка. Туган авыл яшәгәндә, кайтып керер ту­ганнарың, саф сулы чиш­мә­лә­рең, тәгәрәп аунар газиз җи­рең булу – зур бәхет бит!

Алсу Нәҗметдинова,
Алексеевск районының “Ак калфак” оешмасы җитәкчесе
(“Ватаным Татарстан”, /№ 134, 19.09.2018/)