Казанның Киров районында катнаш төрдәге 7-нче номерлы «Алтын хыял» билингваль балалар бакчасы ачылды. Бу төзелә торган «Залесный сити» торак комплексы территориясендә беренче мәктәпкәчә учреждение. Төп белем бирү программасыннан тыш, балалар робототехниканы ике дәүләт телендә дә үзләштерәчәкләр һәм IT-технологияләрне өйрәнәчәкләр, музыкаль һәм хореографик талантларын үстерәчәкләр. Яңа учреждениедә Казан Мэры Илсур Метшин булды.

 

 

 

 

 

 

 

 

340 урынга исәпләнгән иң зур балалар бакчаларының берсе 18 төркемне үз эченә ала. Аларның 10-ысы – 1,5 яшьтән 3 яшькә кадәрге балалар өчен. Бүгенгә ул яртылаш диярлек комплектланган, шуңа күрә бакчада әлегә 11 төркем генә эшләячәк. Балаларны туплау дәвам итә.

Ике катлы мәктәпкәчә белем бирү учреждениесендә җиһазландырылган ата-аналар бүлмәсе, медицина блогы, зур азык-төлек блогы, актлар залы, спорт һәм музыка заллары, функциональ зоналар, компьютер сыйныфы һәм татар телен өйрәнү сыйныфы бар. Барлык төркемнәрдә дә табигый һава агымы системалары урнаштырылган, ә ясле төркемнәрдә санузелда унитазлар куелган һәм җылы идәннәр җәелгән (бүгенге көндә бу расланган стандартка керми). Биналарны карап чыккач, Казан Мэры бу уңайлыкларны шәһәрнең барлык балалар бакчалары өчен нормативка кертү өчен ТР Баш инвестиция-төзелеш идарәсенә тәкъдим кертергә кушты.

«Бик яхшы тәэсир калдыра! 2020 ел азагында бу безнең кечкенә шәһәрлеләребезгә, Залесный бистәсендә яшәүчеләргә чираттагы бүләк. 10 ясле төркем белән 340 урынга исәпләнгән яңа билингваль балалар бакчасы – ата-аналар өчен дә, балалар өчен дә, хезмәткәрләр өчен дә чын хыял. Һәм шул исәптән минем хыялым да: ниһаять, без тулысынча җиһазландыруны күрәбез – музыкаль, спорт җиһазлары, аш бүлмәсе, искиткеч йокы, уен зоналары», – диде Илсур Метшин.

 

 

 

 

 

 

 

 

«Татарстан һәм Казан IT-технологияләрне үстерүгә зур игътибар бирә. Без балаларны моңа кече яшьтән әзерли башларга кирәк, дип саныйбыз. Шуңа күрә безнең балалар бакчасының өстенлекле юнәлеше – IT-технологияләр аша һәрьяклап үсеш», – дип сөйләде учреждение мөдире Алсу Биктова. Моның өчен биредә компьютер сыйныфы булдырылган. 3-4 яшьтән балалар лего-конструкция белән шөгыльләнә башлаячак, аннары алар алынган конструкцияләрне робототехника ярдәмендә җанландырачак. Ә 5 яшьтән 7 яшькә кадәр белем бирү процессына текстсыз программалаштыру өчен «ПиктоМир» программасы кертеләчәк, чөнки бу яшьтә балалар укый һәм яза белми.

Төп белем бирү программасыннан тыш, процесска өстәмә түгәрәкләр дә – футбол, нәфис гимнастика, хореография, шахматлар – кертү планлаштырыла. «Ләкин без аларны, әти-әниләр ихтыяҗларыннан чыгып, кертәчәкбез», – дип өстәде балалар бакчасы җитәкчесе.

«340 урынга исәпләнгән 10 ясле төркеме булган яңа билингваль балалар бакчасы – ата-аналар өчен дә, балалар өчен дә, хезмәткәрләр өчен дә чын хыял»

Моннан тыш, учреждениедә сәламәтлек мөмкинлекләре чикләнгән балалар йөриячәк ике төркем каралган: аутистик спектрда тайпылышлар булган һәм башкалар. «Хәзерге вакытта безгә шундый ике бала килде, әлегә алар катнаш төркемнәрдә шөгыльләнәчәкләр. Җайлаштырылган белем бирү программасы буенча алар белән дефектолог эшләячәк», – дип аңлатты Алсу Биктова.

Учреждение штатында 88 кеше исәпләнә. Алар арасында тәрбиячеләр, татар телен өйрәтү буенча белгеч, физик культура буенча инструктор, музыка җитәкчеләре, дефектолог, укытучы-логопедлар бар.

 

 

 

 

 

 

 

 

Хәзерге вакытта «Залесный сити» торак комплексының файдалануга тапшырылган дүрт йортында 807 кеше яши, шулар арасында 291 бала бар. Бу территориядә 26 күп фатирлы торак йорт төзү планлаштырыла, ул вакытта биредә яшәүчеләрнең гомуми саны якынча 17 мең кеше тәшкил итәчәк. Бүгенгә «Залесный сити» торак комплексында бу беренче балалар бакчасы. Якында Залесный бистәсендә, «Салават күпере» микрорайонында балалар бакчалары бар, шулай ук ерак түгел 82-нче номерлы «Гөрләвек» балалар бакчасы урнашкан.

«Демография» зур илкүләм проектына, илебез Президенты Владимир Путинга һәм Татарстан Президенты Рөстәм Миңнехановка балаларга шундый бүләкләре өчен рәхмәт, – диде Казан шәһәр башлыгы. – Без яхшы темп алдык – быел без 2220 урынлык 9 яңа балалар бакчасы төзедек. Һичшиксез, бу эшне дәвам итәрбез».

Ике катлы бинаны төзү 2019 елның декабрендә башланды һәм агымдагы елның августында тәмамланды. Проектлаучы булып «Татинвестгражданпроект» дәүләт унитар предприятиесе, подрядчы буларак «Алтын групп» җаваплылыгы чикләнгән җәмгыяте чыгыш ясады.

Әлеге чарада шулай ук Киров һәм Мәскәү районнары администрациясе башлыгы Сергей Миронов, Мәгариф идарәсе башлыгы Ирек Ризванов һәм башкалар катнашты.