Татарстан Рәисе Рөстәм Миңнеханов XIV Бөтенроссия татар авыллары эшкуарлары җыенының пленар утырышына килде. Тәүдә ул “Корстон” сәүдә-күңел ачу комплексында оештырылган Россия Федерациясе төбәкләрендә җитештерелгән продукция һәм халык кәсебе товарлары күргәзмә-ярминкәсе белән танышып чыкты.
Бөтендөнья татар конгрессының Татар эшмәкәрләре белән эшләү бүлеге җитәкчесе Фәрит Уразаев хәбәр итүенчә, күргәзмә-ярминкәдә Росссия Федерациясенең 14 төбәгеннән 127 эшмәкәр, 60 хуҗалык субъекты катнаша: Түбән Новгород, Пенза,Мәскәү, Башкортстан, Омск, Төмән өлкәләре һ.б. Күргәзмәдә казылык, каз итләре, милли киемнәр, яшелчәләр, сувенирлар, чәйләр, бал продукцияләре урын алган.
Белешмә: Татарстан башкаласында 29-31 март көннәрендә Бөтендөнья татар конгрессы оештырган XIV Бөтенроссия татар авыллары эшмәкәрләре җыены уза. Бу форумга Россиянең 37 төбәгеннән 900дән артык катнашучы килде.
