“Тәрбиясе җитешмәгән җирдә гүзәл ашлык җитешмәгән кебек, тиешле тәрбия бирелмәгәндә –гүзәл кеше дә җитешмәс”. Ризаэддин Фәхреддин.
Унөченче республикакүләм Ризаэтдин Фәхретдин укулары быел Мамадышның 3нче санлы урта мәктәбендә үткәрелде. Аңа республика районнарыннан дистәләгән татар теле һәм әдәбияты укытучылары, мәгариф бүлекләренең милли мәгариф һәм төбәкара хезмәттәшлек буенча методистлары килгән иде.
–Соңгы вакытларда ел саен гыйнвар ахырында һәм февраль башында җыелып, милли мәгариф юнәлешендә башкарылган эшләргә йомгак ясыйбыз. Ризаэтдин Фәхретдиннең әхлак тәрбиясе юнәлешендәге хезмәтләренең тормышка ашырылуын барлыйбыз. Ул, асылташ кебек, бик күп яктан ялтырап китә. Аны өйрәнеп бетерү мөмкин түгел. Быелгы укуларга да катнашырга 300дән артык укытучы теләк белдереп эшләрен җибәргәннәр иде. Монда чыгыш ясау өчен яңа фикерләр булган эшләрне генә сайлап алдык, – диде Татарстан һәм фән министрлыгының милли мәгариф бүлеге җитәкчесе Алсу Шәрипова. Бүгенге фән-техника казанышлары тормыш көнкүрешебезгә зур тизлек белән керә барган, компьютерлаштыру яшәеш рәвешебезне яулап алган заманда милли үзаңны саклау, милли тәрбия багланышларын яңарту аеруча мөһим. Кунаклар районыбызда бу юнәлештә гаять киң кырлы эшләр башкарылганын күрә алдылар. 3нче санлы мәктәпнең фойесында ук аларны Кече Кирмәннең “Сандугач“ халык уен кораллары фольклор ансамбле үзенең сокландыргыч моңнары белән каршы алды. Рус, керәшен, татар, мари, удмурт милләте вәкилләренең йолаларына, гореф-гадәтләренә, көнкүрешләренә багышланган стендлар, күргәзмәләр әзерләнгән иде. Алар белән районыбыз мәктәпләре мөгаллимнәре һәм укучылары таныштырды, җырлап-биеп тә күрсәттеләр. “Ак калфак“ оешмасы ханымнары да мәгариф учреждениеләре белән тыгыз элемтә урнаштырганнар. Укучы балалар татарның чәк-чәк, гөбәдия, пәрәмәч, катык, бәлеш, токмачлы аш, кыстыбый кебек милли ризыклары турында илһамланып һәм телеңне йотарлык итеп сөйләделәр.
Муниципаль районыбыз башкарма комитеты җәтәкчесенең социаль мәсьләләр буенча урынбасары Алена Сморнова кунакларга Мамадыш төбәге мәктәпләрендә милли тәрбия юнәлешендә башкарылар торган эшләр турында сөйләде. Казан дәүләт федераль университеты профессоры, филология фәннәре докторы, язучы Хатип Миннегулов:
– Сезнең җәмгыятьтәге вазыйфагыз бик зур. Авыр, кыен, мәшәкатьле булса да, хезмәтегез игелекле. Сез бит–тел, милләт мәсәьләләрен тормышка ашыручылар, рухи хәзинәне киләсе буыннарга җиткерүчеләр ,–дип мөгаллимнәргә югары бәясен биреп киткәннән соң: –Мин Ризаэддин Фәхреддинне үз хезмәтләремдә татарның Әбугалисинасы дип атдым. Кеше нинди булырга тиеш, дип сорасалар, үзенең әхлаклылыгы, тырышлыгы, тыйнаклыгы, кешеләргә мөнәсәбәте, хезмәтләре белән Ризаэддин әфәнде моның үрнәге булып тора. Бу укулар–халкыбызны, милләтебезне берләштерә торган бер олы чара, –дип, тә әйтеп узды. Ризаэддин Фәхретддин–егерменче гасыр татар дөньясының иң күренекле шәхесләреннән берсе: әдәбиятчы да, журналист та, тарихчы да, җәмәгать эшлеклесе дә, унбиш ел чамасы мөфти булган кеше. Үзеннән соң бай әдәби һәм тәрбияви мирас калдырган.
Укуларның пленар өлешендә мәктәптә милли белем һәм тәрбия эшчәнлеге хакында 3нче санлы мәктәпнең югары квалификацион категорияле укытучысы Нәзилә Фәрхуллина, тәрбияне балалар бакчасыннан башларга кирәклеге хакында Мамадыштагы “Әкият“ балалар бакчасы өлкән тәрбиячесе Фирдания Зиатдинова чыгыш ясадылар. Аннан районыбыз мәктәпләре укытучылары Энҗе Шаһиева, Гөлнара Сафина, Миләүшә Нәҗипова, Лениза Фазлыева, Зөбәрҗәт Хәйбуллина осталык дәресләре; Рәмзия Мәгъфурова, Ринат Хәйруллин, Гөлзия Сәләхетдинова, Рузилә Нәкыйпова тәрбия сәгатьләре күрсәттеләр. Ахырдан дүрт секциядә укуларга килгән хезмәтләр тыңланды. Эшләре иң яхшылар дип сайлап алынган һәм укуларга чакырылган мөгаллимнәргә республика Мәгариф һәм фән министрлыгының сертификатлары тапшырылды.
Минневәрис Мингалиев тексты һәм фотосы.
