Самарның “Яктылык” мәктәбендә өлкәнең урыс мәктәпләрендә укучы балалар арасында татар теле буенча олимпиада уздырылды. Чарада Самара, Тольятти, Сызрань шәһәрләре мәктәпләрендә белем алучы балалар катнашты.

Бәйге берничә өлештән торды.

Язма эш. Монысы инде БДИга ошатып эшләнгән иде.

Аннары һәр бала үзе теләгән шигырьне сөйләде. Монда инде укучының сәнгати осталыгы да күз алдында торды.

Өченчесе – залдагы халык алдында бирелгән сорауларга татарча җавап тоту булды.

Әйтергә кирәк, монысы иң авыры, чөнки монда уйлап торырга вакыт юк.

Һәр юнәлештә баллар куелып барды.Әлбәттә, номинацияләр күп иде.

Иң кечкенә бала – ул Самардан Самат Мәхмүтов булды, Гаиләдә әти-әнисе тик татар телендә генә аралашалар. Бәйгедә катнашкан ике балалары да, тик мактауга гына лаеклар.

Самардан Алсу исемле кыз да соклану хисләре генә уятты. Язма эше дә яхшы, Габдулла Тукайның озын гына шигырен бәгырьләргә үтәрлек итеп укыды. Алып баручы: “Алсу, хәзер бит яшьләр инглизчә, французча җырлап йөриләр, ә сүзләрен аңламыйлар. Ә син сөйләгән шигыреңне аңыйсыңмы?” дигәч, ул шигырьнең эчтәлеген урысча сөйләп бирде.

Кайбер балалар шигырь белән берлектә әле җырлар да әзерләп килгәннәр.

Дөрес, җырлар өчен баллар куелмады. Дәрәҗәле урыннарны алганнарга зур бүләкләр бирелсә, бәйгегә килгән һәр баланың кулына берәр букча бүләк тоттырдылар. 11нче сыйныфлар арасында Тольяттидан килгән Наил Исхаковка тиңнәр булмады. Озын буйлы сөйкемле егет язма эше буенча да иң зур балны җыйган, шигырьне дә оста иттереп әһәңле сөйләде. Җырлап та күрсәтте. Алып баручы аңа дистәләгән сорау бирде һәм ул аларны аңлап, төпле җаваплар да кайтарды. Олимпиада да катнашкан балалар үзләренең татарлыклары белән горурланалар. Араларында намазга басучылары да бар. Мәктәп мөдире Радик Газизов быелгы бәйгедән бик канәгать булуын белдерде. Залдагы ата-аналар балаларның шигъри чыгышларын йотлыгып тыңладылар.

Барлык балалар да шундый шигъри юллар тапканнар ки, кызыл сызык булып бер идея ята: “Без барыбыз да татарлар”.

Шамил Баһаутдин, Самара шәһәре.

www.tatarlarsamara.org