Казанның «Урак һәм Чүкеч» («Серп и молот») урамындагы 24 нче йорт диварына Ренат Ибраһимовка мемориаль такта урнаштырылды. Истәлек тактасы хәйрияче тарафыннан куелган.
«Ренат Ибраһимов – данлыклы җырчы, без якташлар да, күршеләр дә идек. Безнең Бишбалта авылында шундый истәлек тактасы булсын әле дип элеп куйдык», – диде танылган хәйрияче Гарәфетдин Хисаметдинов «Татар-информ» хәбәрчесенә.
Танылган җырчы бу йортта 1969 елдан 1972 елга кадәр 3 ел яшәгән. Җырчы – 35нче, Гарәфетдин Хисаметдинов 36нчы фатирда яшәгән. Җырчының әнисе Кукмарадан булуы да аны Кукмарада туган хәйрияче белән берләштергән.
«Без Ренат Ибраһимовның якыннары-туганнары белән дә сөйләштек. Шушы йортта яшәүчеләрдән рөхсәт алдык – күпчелек теләктәшлек белдерде, мемориаль тактаны рәсми комиссия аша уздырдык», – диде хәйрияче.
Гарәфетдин Хисаметдинов бу тактаны Казанның Киров районының 100 еллыгы уңаеннан да урнаштырылуын ассызыклады.
Мемориаль тактаның скульпторы – Зөлфия Мөхәммәдьянова.
