Бөтендөнья татар конгрессы бинасында VIII Халыкара «Җәлил укулары» әдәби бәйгесенең жюри утырышы узды. Утырышта жюри әгъзалары конкурсның нәтиҗәләрен раслады һәм барлык номинацияләр буенча җиңүчеләрне билгеләде.
Халыкара әдәби бәйге Татарстан Республикасы Мәдәният министрлыгы, Бөтендөнья татар конгрессы һәм Татарстан Республикасы Мәгариф һәм фән министрлыгы тарафыннан оештырылды.
Быел конкурс Россия төбәкләреннән һәм чит илләрдән килгән катнашучыларны берләштерде. Катнашучылар Муса Җәлил әсәрләрен татар, рус һәм дөнья халыклары телләрендә сәнгатьле итеп уку, фронтовик язучылар иҗатын башкару, коллектив чыгышлар, шулай ук һөнәри башкаручылар һәм авторлык номинацияләрендә көч сынашты.
Конкурс дүрт этапта узды. Барлык этаплар да дистанцион форматта үткәрелде, жюри катнашучыларның видеоязмаларын бәяләп, сәнгатьлелек, эчтәлекне аңлау, башкару осталыгы һәм образга туры килү кебек критерийлар буенча баллар куйды. Нәтиҗәдә, һәр номинациядә иң көчле чыгышлар тәкъдим иткән катнашучылар җиңүчеләр дип танылды.
Жюри утырышында конкурсның югары оештыру дәрәҗәсе, катнашучыларның иҗади әзерлеге һәм Муса Җәлил мирасына ихтирам белән карау аерым ассызыкланды. Бәйгенең финалистлары һәм җиңүчеләре 2026 елның февралендә Казанда узачак гала-концертта катнашачак.
VIII Халыкара «Җәлил укулары» әдәби бәйгесе Муса Җәлил иҗатын популярлаштыруга, яшь буында патриотик рух һәм тарихи хәтер тәрбияләүгә мөһим өлеш кертте.
