Агымдагы елның апрель аенда күпләр зарыгып көткән IX Бөтендөнья татар яшьләре форумы узачак.

Әлеге форумга әзерлек уңаеннан, гыйнвар-февраль айларында «Акыл фабрикасы» проекты кысаларында медиа, яңа мәдәният, тарих, мәгариф һәм тәрбия, цифрлаштыру, бизнес юнәлешләре буенча 6 түгәрәк өстәл оештырыла. Безнең максат – актуаль темаларны тикшереп, яңа идеяләр формалаштыру, әлеге юнәлешләрне төбәкләрдә үстерү юлларын табу.

25-26 гыйнвар көннәрендә Бөтендөнья татар конгрессы бинасында тарих, мәдәният һәм медиа юнәлешләре буенча түгәрәк өстәлләр узды.

Тарихка багышланган утырышта барлык спикерлар да тарихны популярлаштыру һәм системалаштыру буенча үзләренең тәкъдимнәрен кертте. Бердәм концепция булдыру, яшьләр белән нәтиҗәле эшләү һәм тарихны заманча форматларда киң җәмәгатьчелеккә җиткерү төп максатлар итеп билгеләнде.

Татар мәдәнияте буенча оештырылган түгәрәк өстәлдә мәдәни мирасны саклау, яңа иҗади проектлар булдыру һәм төрле буыннарны кызыксындыру өчен, комплекслы алымнар куллануның зарурилыгын ассызыкладылар.

«Татар мәдәниятен үстерү өчен, аның төрлелеген сакларга, заманча технологияләр һәм маркетинг мөмкинлекләрен кулланырга кирәк. Бу юнәлештә иҗади лабораторияләр, яңа форматлар, профессиональ мәктәпләр һәм цифрлаштыру проектлары зур әһәмияткә ия. Татар мәдәнияте яңа дәрәҗәгә күтәрелсен өчен иҗади, финанс һәм оештыру ресурсларын берләштерү таләп ителә», – дигән нәтиҗәгә килде спикерлар.

Медиа өлкәсенә багышланган түгәрәк өстәлдә исә татар яшьләре өчен заманча форматлар, сыйфатлы контент булдыру, медиадагы төп проблемалар һәм үсеш юллары турында фикер алыштылар.

Шулай итеп, «Акыл фабрикасы» проекты кысаларында үткәрелгән түгәрәк өстәлләр яшьләргә милли кыйммәтләрне һәм тарихны заманча, кызыклы итеп җиткерү юлларын эзләү буенча әһәмиятле мәйданчык булды.

Биредә әйтелгән фикерләр һәм тәкъдимнәр IX Бөтендөнья татар яшьләре форумы эшчәнлегендә төп юнәлешләрне формалаштыруда ныклы нигез булыр һәм киләчәктә татар яшьләре өчен яңа проектлар булдыруда ярдәм итәр дип өметләнәбез.

📸 Диләрә Галимова фотолары