Эшлекле сәфәрен дәвам итеп, Татарстан Республикасы Премьер-министры урынбасары, Бөтендөнья татар конгрессы Милли Шура рәисе Васил Шәйхразыев Бурятия Республикасында Үзәк мәчеттә булды. Шулай ук биредә яшәүче татарларның мәдәни тормышы белән дә танышты.
Делегация составында Бөтендөнья татар конгрессы Башкарма комитеты җитәкчесенең беренче урынбасары Марс Тукаев, Ерак көнчыгыш федераль округындагы татар иҗтимагый оешмалары җитәкчеләре дә бар.
Алар Бурятия Республикасы татарлары төбәк милли-мәдәни мөхтәрияты иҗтимагый оешмасының 20 еллыгы һәм “Байкал-Идел” бию мәктәбенең 15 еллыгына багышланган концерт кичәсендә катнаштылар. Бөтендөнья татар конгрессы Милли Шура рәисе Васил Шәйхразыев активистларны тәбрикләде.
Чара күркәм музыкаль чыгышлар белән үрелеп барды. Анда Татарстан Республикасының сәнгать осталары, шулай ук Бурятиянең иҗат коллективлары катнашты.
Милләтебез алдындагы олы хезмәтләрен искә алып, татар халкының телен, мәдәниятен үстерүдә, гореф-гадәтләрен саклап калуда башкарган зур эшләре өчен быел үзенең 20 еллык юбилеен билгеләүче Бурятия Республикасы татарлары Төбәк милли-мәдәни мөхтәрияты иҗтимагый оешмасы Бөтендөнья татар конгрессының Рәхмәт хаты белән бүләкләнде. Шулай ук, иҗтимагый оешмага Татарстан Республикасы Рәисе Рөстәм Нургали улы Миңнехановның махсус бүләкләре – татар телендә матур әдәбият китаплары тапшырылды. Быел үзенең 15 еллык юбилеен билгеләп үтүче «Байкал-Идел» бию мәктәбенә Бөтендөнья татар конгрессы милли костюмнар бүләк итте.
Бурятия Республикасының Атказанган мәдәният хезмәткәре, Бурятия Республикасы татарлары Төбәк милли-мәдәни мохтариятенең мәдәният буенча комитеты рәисе, быел үзенең күркәм юбилеен – 70 яшен билгеләп үтүче Виктор Михайлов, Бурятия татарлары Төбәк милли-мәдәни мохтариятенең актив әгъзасы, «Байкал-Идел» бию мәктәбе җитәкчесе Татьяна Вәлиева Бөтендөнья татар конгрессының “Татар милләтенә күрсәткән олы хезмәтләре өчен” медале белән бүләкләнде.
Бурятия татарлары Төбәк милли-мәдәни мохтарияте иҗтимагый оешмасы Советы рәисе, Бурятия Республикасының «Россия халыклары Ассамблеясе» Гомумроссия иҗтимагый-дәүләт оешмасының төбәк бүлеге рәисе Саҗидә Баталова, Бурятия Республикасы Халык Хуралы депутаты, «Бердәм Россия» фракциясе һәм Дәүләт төзелеше, җирле үзидарә, законлылык һәм дәүләт хезмәте мәсьәләләре комитеты әгъзасы Максим Исмәгыйлев, Бурятия Республикасы Усть-Кяхта авылы «Алмагачлар» Татар мәдәнияте үзәге директоры Әлфия Рәхмәтуллина, Бурятия татарлары Төбәк милли-мәдәни мохтарияте матбугат сәркатибе, иҗтимагый оешманың «Тамырлар» татар яшьләре үзәге рәисе Нәзилә Янькова, Бурятия татарлары Төбәк милли-мәдәни мохтариятенең Халык остасы Фәния Гәрәева, «Лаккитон» вокал-эстрада төркеме, Бурятия Республикасы Харашибирь авылы «Шатлык» татар иҗат төркеме җитәкчесе Елена Гарипова Бөтендөнья татар конгрессының Рәхмәт хаты белән бүләкләнде.
