Форумга килгән Чаллы яшьләре өчен милли кул эшләмәләре күргәзмәсе, өстәл уеннары һәм психология, сәнгать, мәдәният, медиасфера һәм имидж юнәлешләрендә остаханәләр оештырылды.

Форум ахырында катнашучылар төркемнәргә бүленеп, үз проектларын тәкъдим итте. Җиңүче проектлар арасында «Татар тайм» (татар мәдәниятенә багышланган мобиль кулланма), «Татар ашлары» (татар ризыкларының рецептлары сайты) һәм «Татар аланы» (татар яшьләре аланы) булды.

Җиңүче проектлар ел дәвамында «Мизгел» милли мәдәният клубы ярдәме белән гамәлгә ашырылачак.