Татарстанда Идел буе Болгар дәүләтендә исламны кабул итүгә 1100 еллыкны бәйрәм итү уңаеннан ТР Дәүләт җыр һәм бию ансамбле «Болгар эзләреннән» концерт программасы белән гастрольләргә чыга.
«13 -18 май көннәрендә Әстерхан, Волгоград һәм Самара шәһәрләрендә концертлар планлаштырылган», дип хәбәр итә ансамбльнең матбугат үзәге.
Гастрольләр ТР Мәдәният министрлыгы ярдәме белән РФ Мәдәният министрлыгының гастроль-концерт планы буенча үткәрелә.
Концерт программасының нигезен тирән фольклор тамырлы номерлар – татар мәдәниятенең шедеврлары тәшкил итә. Оркестр һәм хор татар халык җырлары белән таныштыра. Программаны татар биюләре тулыландыра, диелә хәбәрдә.
Концертның икенче бүлегендә «Туй» музыкаль-хореографик спектакле күрсәтелә. Әлеге әсәр Казан, Мәскәү, Владимир, Чабаксар, Пермь, Свердловск, Төмән һәм башка шәһәрләр тамашачысына таныш инде.
Концерт 13 майда – Әстерханның «Аркадия» мәдәният сараенда, 16 майда – Волгоградның «Офицерлар йортында», 18 майда Самараның Металлург мәдәният сараенда күрсәтелә.
