— Мөхәммәд (с.г.в.) фитыр сәдакасын якынча 3640 г йөзем, хөрмә җимешеннән яки арпадан түләргә кушты. Әлеге сәдаканы шушы ике бәянең теләсә кайсы белән түләргә ярый. Әмма зәкәт бирә алучы, ягъни кулында 280 мең сум акчасы булган кеше йөзем бәясе белән 600 сумнан түләсә хәерлерәк. Аны акчалата һәм шулай ук безнең җирлектә ашала торган ризык белән дә тапшырсаң ярый.— Фитыр сәдакасын гаиләдә һәр кеше бирәме?
— Бу сәдаканы балигълык яшенә җиткән, гает көнне кулында көндәлек чыгымыннан тыш 22 мең сум акчасы булган һәр мөселман бирергә тиеш. Әгәр моның кадәр акчасы булмаса, фитыр сәдакасы мәҗбүри түгел, ләкин теләсә, бирә ала.
— Гадәттә, бу сәдаканы уразаның соңгы ун көнендә бирәләр. Ни өчен?
— Бу сәдаканы рамазан ае дәвамында бирcәң була. Әмма иң хәерлесе — Ураза гаете көнне гает намазына кадәр тапшыру. Мөхәммәд (с.г.в.): “Кем дә кем аны гает намазын укыганчы бирсә, ул гөнаһлардан пакьләүче, кабул кылынган сәдака була, ә кем дә кем гает намазыннан соң тапшырса, ул гади сәдакага әйләнә”, — диде.
— Сәдаканы кемгә бирергә? Әти-әни, оныклар, туганнарга ярыймы?
— Фитыр сәдакасы зәкәт алырга лаеклы мөэмин-мөселманга бирелә. Моңа фәкыйрьләр, ягъни көндәлек ихтыяҗлары өчен акчасы җитмәүче мохтаҗлар, бурычка баткан кеше, аз керемле күп балалы гаиләләр, акча эшләмәүче студентлар, тол хатыннар керә. Әти-әнигә, әби-бабайларга, балаларга һәм оныкларга фитыр сәдакасын бирергә ярамый. Син аларны болай да карарга, ярдәм итәргә тиеш. Ә бертуган абый-апаларга, әти-әнинең бертуганнарына бирергә ярый.
— Мәчеткә тапшыру дөресме?
— Әгәр мәчет фитыр сәдакасын аерым тартмага җыеп, мохтаҗларга таратса, бирергә ярый. Фитыр сәдакасын мәчетнең көндәлек чыгымнарына тоту киңәш ителми, чөнки Мөхәммәд (с.г.в.) аны мохтаҗ кешеләрне шатландыру өчен бирергә кушты.
