«Күңелемнең серләре» җыентыгындагы барлык шигырьләре — туган якка, китап авторы дөньяга килгән Карасу авылына, аның балачагы һәм яшьлеге үткән җиргә, аның кешеләренә булган мәхәббәте турында.

Гөлнур Хәсәнованы районда авыл хуҗалыгы производствосы ветераны буларак беләләр. Егерме ел дәвамында ул автомат дуңгызчылык комплексы предприятиесендә технолог булып хезмәт куя һәм үз эшенең остасы була.

Бөтен нәрсәнең икътисадый җимерелүенә китергән сәяси үзгәрешләр чорында аны авыл хуҗалыгы идарәсенең зоотехника бүлегенә эшкә чакыралар.

Иң авыр туксанынчы елларда, бартер елларында, тагын ун ел белгеч булып эшли, районның терлекчелек тармагына исән калырга һәм аякка басарга ярдәм итә.

Һәм кинәт – шигырьләрме?

Ул чагында зоотехния белгече шундый нечкә күңелле дип кем уйлаган?

Ә ул шигырьләрне мәктәп эскәмиясеннән яза башлаган. Туган як табигате аны иҗатка илһамландыра.

Китапны тәкъдир итү авыл китапханәсендә узды, анда тантана гаеплесенең сыйныфташлары, дуслары һәм якыннары җыелды. Шуңа күрә аның беренче китабы белән танышу җылы, иркен атмосферада узды, анда барысы да үзләрен уңайлы хис итте.

Китапханәче Гүзәл Вәлиуллина һәм районның «Ак калфак» оешмасы җитәкчесе Әлфия Нурхәммәтова кичәне оештыруда булышлык күрсәттеләр. Кичә барышында Гөлнур балачак мизгелләрен искә алып сөйләде, әнисе турындагы хатирәләре белән уртаклашты.

Әлфия Нурхәммәтова, «Ак калфак» хатын-кызлар хәрәкәте активисты булган дустын, җыентыгы басылып чыгу белән котлап, үз куллары белән чигелгән баш киеме – калфак бүләк итте.

Җавапка шамаил алды. Ачыкланганча, шигырьләр – китап авторының бердәнбер мавыгуы түгел икән. Гөлнур Хәсәнова шулай ук шамаиллар ясау техникасын да камил үзләштерә. Менә чыннан да, «талантлы кеше һәрнәрсәдә дә талантлы» дигән әйтем аңа бик дөрес килеп тора.

Авылдашлары тантана гаеплесенә Фәүзия Нурхәммәтова тарафыннан язылган Карасу ягының табигате сурәтләнгән картина бүләк иттеләр. Яраткан оныкларының тәбрикләү сүзләре Гөлнурга иң зур бүләк булды, алар да яраткан әбиләре кебек үк бар нәрсәгә дә сәләтлеләр икән.

— Гөлнур иҗат иткән шигырьләр беркемнекенә дә охшамаган, – диде Мәдинә Зәйдуллина, җыентык авторын истәлекле вакыйга белән котлап. – Алар шулкадәр тирән мәгънәле һәм лирик, һәрберсен миниатюрадагы хикәя, яки кечерәк бер ода кебек күзалларга мөмкин. Чөнки аның һәрбер иҗат җимеше – йә табигать күренешенә, йә конкрет затка мөрәҗәгать итү, аларның иң яхшы сыйфатларын күтәрү. Шул ук вакытта алар күңелгә үтеп керәләр, хәтта аның иң ерак почмакларына кадәр барып җитәләр. Китапның «Күңелемнең серләре» дип аталуы очраклы түгел.

Чарада Зиннур Мөхәммәдиев, Венера Мөхәммәдиева һәм Гөлия Мифтәхова башкаруындагы туган якка багышланган җырлар нур өстенә нур булды.