30 июнь көнне Грозный шәһәрендә татар халкының милли бәйрәме Сабантуй узачак. Бәйрәмдә Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев катнашачак.
Сабантуй мәйданчыгында татар ишегаллары эшләячәк. Сабантуйның чын бизәге – милли көрәш, бу көнне тамашачылар билбау көрәшендә катнашучыларның җитезлеген һәм көчен бәяли алачаклар. Шулай ук барлык теләүчеләр өчен спорт ярышлары узачак: чүлмәк сугу, капчыкларда йөгерү, чиләк-көянтә белән су ташу һ.б.
Моннан тыш, бәйрәмнең төп сәхнәсендә Татарстанның әйдәп баручы ансамбльләре һәм артистлары катнашында концерт узачак.
