Һәрнәрсәнең үз вакыты. Миллек бәйләүнең дә билгеле бер чоры – июньнең 15ләре – июль уртасы. Яфрагы коелмый торганы – шул вакытта җыйганы: инде каен чәчәк аткан, алкаларын койган, яфраклары туклыклы матдәләр  һәм табигый эфир майлары белән тулыланган. Ә миллек өчен иң яхшысы – әле беркайчан да чәчәк атмаган, яшь каен агачы. Аның яфраклары шома, ефәк һәм назлы.

Миллекне көннең беренче яртысында, коры көнне жыярга киңәш ителә. Кемдер – мәтрүшкәле каен себеркесе белән чабынырга ярата, кемдер – имән миллеген үз итә. Һәркайсы үзенчә файдалы һәм “тәмле”. Әрем кушканы – вируслар таралган вакытта ярдәм итә. Каен миллеге – тәнне ныгыта, дезинфекция ясый, тирне куа, имәннеке – антисептик, йогышсызландыру сәләтенә ия. Ул гипертониклар өчен шәп. Юкә миллеге сулыш юлы авыруларына, салкын тигәндә файдалы. Шомыртныкы да – антисептик, хуш исле, чистарткыч. Миләшнеке, зирекнеке дә дәвалау сәләтенә көчле.

Миллекләр турында боларның барысын да Балтач районы 5нче балалар бакчасында да өйрәтәләр. Миллекне җыярга, бәйләргә, ничек итеп киптерергә, сакларга… “Әби-бабайлардан килгән гореф-гадәтне балаларга да җиткерәбез”, – дип сөйли балалар бакчасы мөдире Гөлнара Мөхәммәд кызы Әсхәтдинова.

Балалар бакчасы коллективы миллек бәйләү буенча мастер-классны Малмыж Сабан туенда да күрсәтте. Сәгъдиевлар, Хәбибрахмановлар гаиләләре олысына да, кечесенә дә миллек бәйләтте. Бәйләгән миллеген һәркем үзе белән алып китте.

Рәмзия ХӘКИМОВА

Автор фотосы