«Идел» яшьләр үзәгенә яңа директор билгеләнде. Моңарчы бу вазифада булган Наилә Галиева урынына Салават Кадыйров тәгаенләнде. Үзәккә директор кую турындагы боерыкны Татарстан Республикасы Яшьләр эшләре министры Ринат Садыйков имзалаган.

«Карар кичә рәсми төстә чыгарылды. «Идел» өчен мин чит кеше түгел инде. Берникадәр тарихка күз салсак, мин иң башта аның «Иделем акчарлагы» проектында катнашырга килгәнем истә. Мин 2018 елда Казанга укырга күченеп килгән идем, аннары милли оешмалар, яшь язучылар даирәсендә кайный башладым. Аннары башка проектларга да кушылдым. Шуннан 2023 елдан алып яшьләр белән эшләүче белгеч булдым. Бөтен проектларны ныклап беләм. Иң башта катнашучы, аннан соң оештыручы ролендә булган кешемен», – дип сөйләде ул «Татар-информ»га.

Кадыйров шулай ук быел 25-31 август көннәрендә үткәреләчәк Татар яшьләре көннәренең юбилей елы булуын билгеләде.

«Алда көтеп торган иң зур күләмле чараларыбызның берсе – Татар яшьләре көннәре. Быел ул 35нче тапкыр узачак. Ул һәр ел саен уздырылып килә, традициягә әверелгән чараларыбызның берсе. Алдагы планнарга килгәндә, финанс кыенлыклар сәбәпле, программалардан төшеп калган проектлар бар. Ул проектларны сагынып безгә шалтыратучылар да җитәрлек. Аларны яңадан эшләтәсе иде. Киләчәктә булган проектларны үстерү һәм, әлбәттә, яңаларын булдыру. Безнең максат – «Идел» проектларын үсешкә илтү, аларның масштабларын тагы да ныграк киңәйтү», – дип ассызыклады яңа директор.

• «Идел» яшьләр үзәге 1999 елдан башлап Татарстан Республикасыннан читтә яшәүче татар яшьләре белән өзлексез эш алып бара. Оешманың татар яшьләре өчен лидерлык мәктәбе, мәдәни-күңел ачу чаралары, бәйге һәм фестивальләр оештыру һәм үткәрүдә 16 елык тәҗрибәсе бар.Оешманың татар яшьләре белән эшләү буенча үз системасы булдырылган. Яшьләр сәясәте өлкәсендәге эшчәнлек яшьләрне актив рәвештә эшкә тартуны күз алдында тота. «Идел» яшьләр үзәге тарафыннан башкарылган чаралар нәтиҗәсе буларак төбәкләрдә 40лап иҗтимагый оешма төзелүе билгеле