Раушан Абдуллин – Төньяк Кавказ хәрби округының махсус билгеләнештәге 10 нчы аерым бригадасының разведчик-саперы, рядовой.
Раушан Мөхәммәт улы 1988 елның 26 июнендә Төмән районы, Нариман авылында туа. 2006 елда урта мәктәпне тәмамлый, шул ук елның декабрендә РФ Хәрби Көчләренә алына. Ел ярым Краснодар краенда хезмәт итеп, контракт буенча Көньяк Осетиядә Россия тынычлык урнаштыручы көчләре составында хезмәт итәргә кала. 2008 елның августында грузин гаскәрләре Көньяк Осетия Республикасына каршы игълан ителмәгән сугыш башлый. 2008 елның 8 августында Раушан грузин гаскәрләренең беренче һөҗүмнәрен кабул иткән тынычлык урнаштыручы көчләр батальоны составында була. Тыныч хезмәтен сугыш өзә.
Ул үз позициясендә булып, тынычлык урнаштыручыларның яшәү урынын саклау буенча сугыш алып бара. Сул аягына үтәли яра ала. Үзенә беренче медицина ярдәме күрсәтеп, сугышны дәвам итә. Батырлык һәм кыюлык күрсәтеп, авыртуны җиңеп, штатлы коралдан дошманның дүрт хәрби хезмәткәрен юк итә. Контроль-үткәрү пункты капкасын үтеп, тынычлык урнаштыручы батальон шәһәрчеге территориясенә пехота ярдәме белән Грузия кораллы көчләренең танкы бәреп керә һәм санитар частена ата башлый. Рядовой Абдуллин, яралы хәрбиләрнең гомерләре куркыныч астында булуын аңлап, рядовой С.Абоимов канаты астында дошман танкы юнәлешендә хәрәкәт итә башлый. Шул вакыт грузин танкы башнясын Абдуллин позициясенә таба борып ата. Тиз арада ориентлашып, ул Абоимовны үз гәүдәсе белән каплый. Снаряд шартлау нәтиҗәсендә аркасы һәм аяклары кыйпылчыклы җәрәхәтләр, көчле контузия ала. Берникадәр вакыттан соң ул аңына килә һәм, үзендә көч табып, танк ягына юл тота. Дошманның көчле уты астында канга баткан Раушан кул гранатометы ярдәмендә дошман танкын юк итә. Солдат күпсанлы җәрәхәтләрдән һәм зур кан югалтудан сугыш кырында һәлак була.
Туган авылы Нариманова зиратында җирләнә. Аңа нибары 20 яшь була.
РФ Президентының 2009 елның 9 сентябрендәге 1026 нчы Указы белән Төньяк Кавказ төбәгендә хәрби бурычын үтәгәндә күрсәткән батырлыгы һәм каһарманлыгы өчен рядовой Раушан Абдуллинга РФ Герое исеме бирелә. 2009 елның 5 декабрендә Төмән өлкәсе хөкүмәтендә солдатның әти-әнисе Гөлфрүз һәм Мөхәммәт Абдуллиннарга РФ Героеның аерым Мактау билгесе – «Алтын Йолдыз» медале тапшыру тантанасы була.
2019 елның 20 февралендә «Уацамонга» Көньяк Осетия ордены белән дә бүләкләнә.
Геройның туган авылында җирле халык акчасына «Раушан» мәчете төзелгән, ә ул укыган мәктәп ишегалдында бюст ачыла. Герой исеме белән Төмәннең яңа микрорайонында (2012) һәм Нариман авылында урамнар, шулай ук ул хезмәт иткән хәрби часть каршындагы 17 нче урта белем бирү мәктәбе аталган (Краснодар краеның Горячий Ключ шәһәре). Геройның хәрби частендә һәлак булган сугышчы истәлегенә мемориал урнаштырылган. Раушан укыган мәктәпкә граниттан ясалган истәлек тактасы куелган. Нариманда Ватанны саклаучылар мемориалында, Бөек Ватан сугышында катнашкан бабасы исеме янәшәсендә: «Раушан Абдуллин – Россия Герое» дип уеп язылган.
Чыганак: vk.com.janarishtymen
