Бүген Казанда муниципаль хезмәткәрләр өчен татар теле курсларына йомгак ясалды. Уку узган кешеләргә Башкарма комитет җитәкчесе урынбасары Гүзәл Сәгыйтова квалификация күтәрү турында таныклыклар тапшырды.
Татар телен өйрәнү курслары 7-нче июльдә Туган телләр һәм халыклар бердәмлеге елы кысаларында старт алды. Дәресләр ай дәвамында атнага ике тапкыр – дүшәмбе һәм пәнҗешәмбе көннәрендә уздылар. Курсларга йөрүчеләрнең төркемнәрен сайлап алу мөмкинлеге бар иде – телне өйрәнүчеләр өчен яки үзләренең тел гыйлемнәрен камилләштерергә теләүчеләр өчен. Укуларны Казанның 21 муниципаль хезмәткәре узды. Алар грамматика нигезләрен үзләштерделәр, гади җөмләләрне өйрәнделәр һәм сүзлек запасын киңәйттеләр. Уку табигать, ризык, бәйрәмнәр, гаилә, сәламәтлек һәм башка темалар буенча барды. «Башка телне үзләштерү – икенче күңелне үзләштерү дигән сүз. Шунысы кыйммәтле, сез үзегезнең тыгыз графикта вакыт тапкансыз һәм бу айны татар телен өйрәнүгә багышладыгыз», – дип билгеләде Гүзәл Сәгыйтова.
Уку узган кешеләр арасында Парклар һәм скверлар дирекциясе җитәкчесе урынбасары Айгөл Латыйпова да бар иде. «Дәресләр күп булмады, ләкин алар бик кызыклы иде, интерактив формада уздылар, укытучы барысын да аңлаешлы итеп аңлата иде. Укытуның икенче этабын оештыру начар булмас иде, чөнки бер ай гына аз», – дип сөйләде ул.
Курслар тәмамланганнан соң Казан Башкарма комитеты аппараты җитәкчесе урынбасары – оештыру идарәсе башлыгы Ирина Бочкова татар телен мөстәкыйль онлайн рәвештә өйрәнүне дәвам итә. Ул алга таба да тел өйрәнү буенча шундый курслар оештырырга һәм укучыларга татар мәдәниятенә тагын да ныграк чумарга мөмкинлек бирергә тәкъдим итте.
Гүзәл Сәгыйтова, шулкадәр генә вакыт эчендә телне үзләштереп булмый, бары тик даими практика гына алган белемнәрне ныгытырга ярдәм итәчәк, дип ассызыклады. «Укытучылар белем дөньясына ишек ача гына, әмма сез үзегез керергә тиеш. Бүген интернетта мөстәкыйль белем алу өчен аудио – һәм видеодәресләр җиңел табарга була», – дип билгеләп үтте ул.
Исегезгә төшерәбез, алдарак татар теле курслары онлайн-форматта хезмәт күрсәтү өлкәсе хезмәткәрләре узды. Укулар тәмамлану турында сертификатларны 20 кеше алды – кунакханәләр, рестораннар, җәмәгать туклануы оешмалары хуҗалары.
Алинә Бережная
