29нчы август көнне, сәг. 15.00-дә Казанда Иске Татар бистәсендә татар дин галиме Ш.Мәрҗани һәйкәле янында шәһәркүләм Мәүлид башланып китәчәк. Әлеге чара һиҗри буенча Аллаһ Илчесенең ﷺ 1500 еллыгы белән истәлекле. Аны Татарстан мөфтияте республика җитәкчелеге, ТР Мәдәният министрлыгы һәм Казан шәһәре Башкарма комитетының “Иске шәһәр” Префектурасы ярдәмендә оештыра.

Мәүлид кунаклары өчен мәдәни-мәгърифәтчелек программасының иң көтелгән өлеше булып хаҗга һәм гомрәгә юлламалар уйнату торачак. Шунысы куанычлы: бүген оештыручылар гомрәгә өч өстәмә юллама уйнату турында карар кабул итте, аны чараның партнерлары сыйфатында Дагыстан Республикасы мөфтияте һәм Дагыстанның Татарстандагы Тулы вәкаләтле вәкиле М.Мөслимов тәкъдим итәчәк. Шулай итеп, бәйрәмдә хаҗга – ике һәм гомрәгә дүрт юллама уйнатылачак. Анда Мәүлидкә килгән һәр мөселман катнаша ала.

Фестивальнең махсус кунаклары – Россиядә иң танылган нәшид башкаручы “Нәшидүл ислам” төркеме җырчылары. Алар үзләренең иң популяр нәшидләрен – сөекле Рәсүлебез ﷺ һәм Аллаһы Тәгаләгә мәхәббәт турында җырларын тәкъдим итәчәк. Нәшидләр гарәп һәм рус телләрендә яңгыраячак. Шулай ук бәйрәм сәхнәсендә Мәүлид турында театральләштерелгән тамаша күрсәтеләчәк, халык яраткан хәзрәтләр вәгазьләр сөйләячәк, ә танылган татар артистлары һәм коллективлары дини кануннар кысаларында үзләренең иҗади номерлары белән чыгыш ясаячак. Балалар өчен викториналар узачак: аларга бүләкләр биреләчәк.

Бәйрәмгә рәхим итегез!

Чыганак: dumrt.ru