Мәмдүдә Вәлиуллина – “Туган авылым Куакбаш” китабының авторы. Ул ветераннар советы рәисе булып эшләгәндә җыйган материалларын китап итеп бастыру уе белән яшәгән. Мәмдүдә апага бу эштә авылдашы Фәрхәт Шәйхетдинов, авылда яшәүчеләр булышкан. Шулай итеп, туган авылын тиңсез хәзинәле – китаплы итте.

Шунысы да бар, әлеге китап бүгенге көндә дә актуальлеген югалтмады. Күптән түгел Мәмдүдә апаның оныгы Ләйлә Әхмәтҗанова 4нче мәктәптә фәнни-эзләнү эше яклаган иде. Ул үзенең эшендә әбисе язган чыганаклардан файдаланган. «Туган авылым – Куакбаш» китабында китерелгән кайбер өзекләр, хатирәләр авторлар тарафыннан бик уйланып, күзләрне яшьләндерерлек итеп бирелгән.

Мәмдүдә апаның әтисе Бөек Ватан сугышында һәлак була. Әнисе биш баланы берүзе үстерә.

“7нче классны тәмамлагач, уку теләге зур иде, Иске Куакта укыдым. Аннары мәктәптән соң колхоз идарәсендә эшләдем. Аннары һөнәр училищесында штукатур-малярга укыдым. Алабугада иптәшләр белән төзелештә эшләгәндә гомер буе буе штукатурда эшләп булмаслыгын аңладым һәм эшчеләр факультеты аша институтка керү бәхетенә ирештем”, – дип сөйли Мәмдүдә апа, үткән еллар турында.

Туган авылы мәктәбендә 30 ел дәвамында рус теле һәм әдәбияты укыта. Лаеклы ялда исә  авыл тарихына кагылышлы материаллар туплый.  Һәм күңел юанычы өчен шигырьләр иҗат итә. “Шигырьләрне үзем өчен генә язам. Алар үзеннән-үзе күңелгә килеп туа. Тормышны ярату хисләреннән шундый шигырьләр туадыр, мөгаен”, – ди ул.

Китапханәдә узган чарага аның иҗатын хөрмәт итүчеләр, «Чишмә» әдәби клубы әгъзалары чакырылды. Чара барышында Мәмдүдә Вәлиуллинаның тормышы һәм иҗаты турында бик күп кызыклы мәгълүматлар яңгырады. Алып баручы Сиринә Мөхәммәтшина аның балачагы, ә оныгы Ләйлә Әхмәтҗанова мәктәп һәм студент еллары турында сөйләде.

85 яшьлек Мәмдүдә Суфияновна каләмен төшерми, очрашу барышында да үзенең яңа шигырьләрен укыды, авылның килеп чыгышы һәм шәҗәрәләре турында кызыклы фактлар белән уртаклашты.

Мәмдүдә апаны укучылары, күршеләре, туганнары һәм иҗатын хөрмәт итүчеләр котлады.

Чыганак: zamansulyshy.ru