Форостагы «Сәләт – Ак Барс» яшьләр үзәгендә Луганск Халык Республикасыннан 300 бала өчен «Тәйәт» беренче җәйге профиль сменасы уза. Смена Татарстан Республикасы Рәисе Рөстәм Миңнеханов, Татарстан Яшьләр эшләре министрлыгы, шулай ук Луганск Халык Республикасы җитәкчелеге ярдәмендә узды. Лисичанск һәм Рубежноедан балалар Татарстан Республикасы шеф-субъекты ярдәме кысаларында җәйге ялга җибәрелде.

«Менә өченче ел инде без тарихи территорияләрдән балаларны кабул итәбез, мондый һәр смена безнең өчен үзенчәлекле һәм әһәмиятле. Татарстан җитәкчелегенә зур рәхмәт, чөнки алар ярдәмендә без туган республикабыз балаларын гына түгел, Донецк, Луганск, Херсон һәм Запорожье өлкәләре балаларын да сәламәтләндерә алабыз. Балаларның җәйге ялын оештыру «Яшьләр һәм балалар» милли проекты максатларына тулысынча туры килә. Без балаларның сыйфатлы ялын тәэмин итәргә генә түгел, алар үсә, талантларын ача һәм патриотик рухларын ныгыта алсын өчен куркынычсыз мохит тә булдырырга да омтылабыз. Ә Россия көне кебек бәйрәмнәр аларда Ватанга мәхәббәт һәм бердәмлек хисе тәрбияләргә ярдәм итә», —дип хәбәр итте яшьләр үзәге директоры Кира Маслова.

Быел махсус программа әзерләнгән иде. Татарстан Республикасы Бадминтон федерациясе ярдәме белән балаларга әлеге олимпия спорт төре белән танышу мөмкинлеге туды.

«Сезнең смена кысаларында без катнашучылар өчен бадминтон буенча мавыктыргыч дәресләр әзерләдек, алар анда уен техникасын үзләштереп кенә калмыйча, аның кагыйдәләре, тарихы һәм осталык серләре турында да күп кызыклы нәрсәләр беләчәкләр. Безнең алты тәҗрибәле педагогтан торган команда яшьләргә бу динамикалы һәм мавыктыргыч спорт төрендә беренче адымнарын ясарга бик шатланып ярдәм итәчәк», — дип билгеләп үтте Татарстан Республикасы Бадминтон федерациясе рәисе Юрий Чаплыгин.

Спорт дәресләреннән тыш, сменада катнашучылар иҗатка да чумалар: тәҗрибәле педагоглар җитәкчелегендә алар үзләренең сәнгать әсәрләрен иҗат итәләр, үзләрен сәнгать аша күрсәтергә өйрәнәләр.

«Объект искиткеч. Биредә барысы да уйланылган: уен зоналары, интерактив белем бирү мәйданчыклары, иҗат өчен уңайлы урыннар һәм хәтта спорт почмаклары. Балалар бик шат — алар көн саен ниндидер яңалык ача, ә миңа, әйдаман буларак, аларның ничек үсүен һәм шатлануын күзәтү бик ошый. Бигрәк тә биредә тыныч шөгыльләр өчен дә, актив уеннар өчен дә урын барлыгын бәялим», — дип уртаклашты яшьләр үзәге турында әйдаманнарның берсе.

Көн саен тыюлык паркы буйлап йөрүләр, кояш һәм диңгез ванналары, шулай ук җылы диңгездә коену бу сменаны чын-чынлап сәламәтләндерә.

«Миңа бик ошый, монда бик матур. Көн саен бик күп чаралар, шәп дискотекалар уза. Бик ярдәмчел әйдаманнар һәм яхшы яшьләр. Мин барысы белән дә дуслаштым инде. Барысын да яратам», —дип уртаклашты сменадагы егетләрнең берсе Глеб.

Инде ун көн дәвамында Лисичанск һәм Рубежное мәктәп укучылары Кара диңгез яр буенда онытылмаслык ял белән ләззәтләнәләр, актив ял итүне иҗат һәм спорт белән берләштерәләр.

Чыганак: minmol.tatarstan.ru