3 апрельдә Лениногорск шәһәренең Г.Тукай исемендәге Үзәк китапханәсендә “Яз керде күңелләргә” дип исемләнгән әдәби-музыкаль кичә узды. Әлеге чара шәһәрнең Ш.Бикчурин исемендәге “Чишмә” иҗат берләшмәсе белән берлектә үткәрелде. Күңелгә үтеп керә торган шигырьләр, яз рухы белән сугарылган җырлар, үтемле чыгышлар күңелләрне күтәрде. Аерым алганда Ш.Бикчурин исемендәге “Чишмә” иҗат берләшмәсе җитәкчесе, Татарстан Язучылар берлеге әгъзасы, Ш.Бикчурин, С.Сөләйманова исемендәге премияләр лауреаты, шагыйрь Таһир Шәмсуров, шагыйрә, җырчы, композитор, Ш.Бикчурин исемендәге премия лауреаты Гөләндәм Кәбирова, шагыйрәләр Илсөяр Салахова, Фәридә Әхмәтшина, Зөлфия Мөхәммәтҗанова, Гүзәл Талипова, композитор, җырчы, музыкант, шагыйрь Мансур Хәсәнов, Ш.Бикчурин исемендәге премия лауреаты, шагыйрә Әлфия Сөләйманова чараның бизәге булдылар.
“Чишмә” иҗат берләшмәсенең дәвамчылары булган Лениногорск шәһәренең 11нче гимназиясендә белем алучы яшь каләм ияләреннән торган “Чишмәкәй” иҗат түгәрәгенә йөрүче укучылар үзләренең иҗат җимешләре белән тамашачыны сөендерде.
Әдәби-музыкаль кичәне Ш. Бикчурин исемендәге “Чишмә” иҗат берләшмәсе җитәкчесе, шагыйрь Таһир Шәмсуаров һәм Г. Тукай исемендәге Үзәк китапханәнең милли әдәбият бүлеге мөдире, Бөтендөнья татар конгрессының Лениногорск җирле оешмасы җитәкчесе Ләйсән Рахманова-Шәмсуарова оештырды һәм алып барды.
Әлеге мәртәбәле чара Лениногорск төбәгендә бүгенгедәй киләчәктә дә гүзәллеккә, шигърияткә мәдхия җырлаучылар, яңа шагыйрьләр барлыкка килүенә өмет уятты. Әдәби-музыкаль кичә әдәбият-сәнгать сөючеләргә язның гүзәллеген тоярга ярдәм итте.