Майкоп шәһәренең Пушкин халык йортында мөһим вакыйга – активистларны бүләкләү һәм концерт программасы узды.
Биредә сәламләү сүзе белән Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев чыгыш ясады. Алга таба ул активистларны милләтебез алдындагы олы хезмәтләрен искә алып, татар халкының телен, мәдәниятен үстерүдә, гореф-гадәтләрен саклап калуда башкарган зур эшләре өчен Бөтендөнья татар конгрессының Рәхмәт хаты белән бүләкләде.
Тантаналы өлештән соң чара матур концерт программасы белән дәвам итте, анда Татарстан Республикасы артистлары Зәйнәп Фәрхетдинова, Илмир Ямалов һәм Сөмбел Билалова катнашты. Җырчыларның һәркайсы тамашачыларга милли колорит һәм күңел җылысы белән тулы иң яхшы номерларын тәкъдим итте.
Майкоп шәһәрендәге чара татар мәдәниятенең бәйрәменә генә түгел, халыклар арасында бердәмлек һәм үзара аңлашу символына да әверелде. Программа барлык катнашучыларга да үз тамырлары белән горурланырга һәм традицияләрнең яшәячәгенә һәм үсәчәгенә ышаныч хисе уятырга мөмкинлек бирде.
