Гыйльми җыен Мәрҗани хезмәт иткән һәм хәзер аның исемен йөртүче Аллаһ йортында узган иде. Мәрҗани укуларының быелгысы да Казанда оештырыла.
«Шиһабетдин Мәрҗани исемендәге укулар» — IX Бөтенроссия фәнни-гамәли конференциясе 18 май көнне булачак. Ул мөфти шәех Равил Гайнетдин хәер-фатыйхасы белән тугызынчы ел рәттән үткәрелә.
Максаты – мирасыбызны халкыбызга хезмәткә кую. Төрле елларда Мәскәү, Санкт-Петербург, Түбән Новгород шәһәрләрендә үткәрелгән бу гыйльми җыен икенче ел инде Татарстанның башкаласында «Милли тормыш һәм дин» Бөтенроссия татар дин әһелләре форумы белән бергә уза.
Оештыручылар: Россия Федерациясе мөселманнары Диния нәзарәте, Бөтендөнья татар конгрессы башкарма комитеты, Татарстан Республикасы Фәннәр академиясе.
Программада:
Түгәрәк өстәл: «Татар имамнары: язмышлар һәм әсәрләр» Ш.Мәрҗани ис. Тарих институтында,
пленар утырыш ТР Фәннәр академиясенең төп бинасында уздырыла.
Чарада «Мәдинә» нәшрият йортында нәшер ителүче «Ислам в Российской Федерации» 12 томлы энциклопедик сүзлек тәкъдим ителәчәк һәм Россиянең атказанган рәссамы Ләйлә Хәсьянованың «Милләт лидерлары» сериясендәге эшләрдән татар халкы тарихында иң тирән эз калдырган шәхесләрнең портретлары күрсәтеләчәк.
