21 май көнне Мәскәүнең Татар мәдәни үзәге бинасында 2019 елгы Сабантуйны оештыру комитеты утырышы узды. Анда төрле участоклар өчен җаваплы кешеләрнең хисапларын тыңладылар: иҗади мәйданчыклар оештыру, халык көрәше, гала-концерт һ.б. Шулай ук транспорт белән тәэмин итү, сәүдә нокталарын оештыру, Сабантуй кунаклары һәм катнашучылар иминлеген тәэмин итү мәсьәләләре буенча фикер алыштылар.

Төрле иҗади проектлар авторлары әлеге традицион татар-башкорт бәйрәменә әзерлек кысаларында үзләренең иҗади планнары һәм аларны гамәлгә ашыру буенча башкарылган эшләр турында хисап тотты.

Шулай ук утырышта катнашучылар исеменнән Мәскәүнең татар милли-мәдәни мохтарияте башлыгы Ф.Фарисов “Автономные Татарские Общины Москвы” газетасының баш мөхәррире Илдар Мөхәммәтҗановны 50 яшьлек юбилее белән котлады һәм аңа котлау хаты һәм истәлекле бүләк тапшырды.