1 декабрьдә Мәскәү Дәүләт Кремль сараенда Татарстанның халык артисты Зәйнәб Фәрхетдинованың зур юбилей концерты узды. Чарада Бөтендөнья татар конгрессы Башкарма комитеты җитәкчесе, Татарстан Республикасы Дәүләт Советы депутаты Данис Шакиров катнашты.
Ул кунакларны Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев исеменнән сәламләде.
– Илебездә һәм чит илләрдә яшәүче халкыбызның мәхәббәтен яулаган Зәйнәб Фәрхетдинованың хыялы тормышка ашты. Сез бу чарага бик нык әзерлекле килдегез, Зәйнәб ханым. Мәскәү бүген сезнең кул төбегездә. Котлыйм сезне!, – дип сөйләде Данис Шакиров.
Концерт ике өлештән торды. Беренче өлештә Зәйнәб Фәрхетдинованың популяр, халык яраткан җырлары яңгырады. Икенче өлештә Марат Галимов, Марат Яруллин, Илсөя Бәдретдинова, Элвин Грей, Рәсим Низамов, Филүс Каһиров һәм Илнар Миранов катнашында дуэтлар чыгыш ясады.
