Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев Луганск Халык Республикасының Кировск шәһәрендәге тарих-сәнгать музеенда булды. Биредә Бөек Ватан сугышында Җиңүнең 80 еллыгына багышланган чара узды. Тантана кысаларында татар халкының Ватан азатлыгы өчен көрәшкә керткән өлеше билгеләп үтелде.
Биредә шулай ук “Чишмә “татар мәдәнияте үзәге” Луганск төбәк иҗтимагый оешмасы рәисе Гөлфия Кәбирова, шәһәр ветераннар оешмасы һәм “Йолдыз” Татар мәдәни үзәге вәкилләре катнашты.
Программа барышында татар халкының сугыш вакыйгаларына керткән өлеше турында уникаль материаллар тәкъдим ителде. Сугыш елларында татар халкын данлаган каһарманнар турында сөйләүгә аерым игътибар бирелде. Чарада шулай ук Г.Батаршин турында документаль фильм тәкъдим ителде.
Музей үзе сәнгать-күргәзмәләр залыннан (200 сәнгать әсәре) һәм тарихи залдан (төп һәм фәнни-ярдәмче фондлардан 2,5 мең экспонат) тора.
Сәнгать залында даими рәвештә декоратив-гамәли иҗат һәм рәсем сәнгате күргәзмәләре үткәрелә. Тарихи зал экспозициясенә туган табигатькә, этнографиягә, инкыйлабка кадәрге, сугышка кадәрге, хәзерге һәм яңа чорларга багышланган бүлекләр керә.
