2025 елның 16-18 май көннәрендә Казанда һәм Болгарда «Милли тормыш һәм дин» татар дин әһелләре XV Бөтенроссия форумы узачак. Форум кысаларында тематик дискуссион мәйданчыкларда фикер алышулар планлаштырылган. Мәйданчыкларда рухи-әхлакый кыйммәтләрне саклау, Ислам мәгарифен үстерү һәм милли үзенчәлекне ныгытуда диннең роле турында фикер алышачаклар.

Бүген, 7 май көнне, форум мәйданчыкларына әзерлек буенча оештыру утырышы узды. Аны Бөтендөнья татар конгрессы Башкарма комитеты җитәкчесе, Татарстан Республикасы Дәүләт Советы депутаты Данис Шакиров алып барды. Утырышта Апанай мәчете имам-хатыйбы Нияз хәзрәт Сабиров, Ислам динен кабул итүгә 1000 ел исемендәге мәдрәсә мөдире Ильяс хәзрәт Җиһаншин, шулай ук онлайн форматта Россия төбәкләреннән вәкилләр катнашты.