Алга таба сүз Аксакаллар шурасы тарафыннан 2021 елда – Туган телләр һәм халыклар бердәмлеге елы кысаларында бурычлар һәм тормышка ашырырга ниятләнгән планнар буенча фикер алышу хакында барды. Утырышта Казанда татар-мөселман мәктәбен булдыру, яшь буынга рухи-әхлакый тәрбия бирү, күп телләр өйрәнүгә мәхәббәт тәрбияләү, эш сөючән һәм булдыклы татар ул-кызларын тәрбияләү мәсьәләләре күтәрелде. Моннан тыш, Аксакаллар шурасы әгъзалары мөфтиятнең республикабыздагы Әлмәт, Алабуга, Балтач һ.б. мөхтәсибәтләрендә татар телендә тәрбия бирүче мәктәпләр булдыру тәҗрибәсенә ия булуын ассызыкладылар.
Күренекле татар галиме, тарихчы Индус Таһиров нәзарәтнең мәчет каршындагы курсларда ислам дине нигезләрен татар теле өйрәтү дәресләре белән бергә алып бару башлангычын хуплады һәм аны милләт өчен бик изге, кирәкле эш дип бәяләде. “Әгәр дә татарлар революциягә кадәр Россиянең укымышлы халкы булган икән, моңа безнең динебез, мәдрәсәләребез, муллаларыбыз сәбәпче. Чөнки уку-укыту көчле булган, һәрбер авылда кызларны һәм малайларны аерым укытканнар, мәчет һәм мәдрәсәләр эшләгән”, – дип, ул татар теле дәресләре, вәгазьләр уку, борынгы китапларны өйрәнү, саклау тәҗрибәсен дәвам итәргә чакырды.
Алга таба Аксакаллар шурасы әгъзалары мөфти Камил хәзрәт Сәмигуллин җитәкчелегендә нәзарәтнең туган телебезне үстерү юлына басуын билгеләп, киләчәктә тагын да нәтиҗәлерәк эшләү буенча тәкъдимнәре белән бүлештеләр. Мәсәлән, Яшел үзән районы имам-мөхтәсибе Габделхәмит хәзрәт Зиннәтуллин узган гасырның 90-нчы елларында татар мәктәпләрендә иске имля дәресләрен кертүнең нәтиҗәле булуын ассызыклады. “Бабаларыбыз кулланган хәреф, әлифбаларны кечкенәдән өйрәнә башлау яшь буында дингә кызыксыну уятты, алар хәзер мөселман гаиләләре кордылар, балаларына мөселман тәрбиясен бирәләр. Шуңа иске имля, гарәп әлифбасын өйрәтүгә юк кына әйбер дип карарга кирәкми, аны балаларга сеңдерергә кирәк”, – диде ул.
Ә менә Аксакаллар шурасының Мөслим районы вәкиле Расих хәзрәт Каюмов халык санын алу кампаниясендә җиң сызганып эшләргә чакырды: “Безгә, татарларга, халык санын алу алдыннан тарихи китаплар бастырырга кирәк. Халыкның үзаңын күтәрергә кирәк”, – диде ул һәм халык белән ныграк аралашырга кирәклеген әйтте.
Аксакаллар шурасы рәисе урынбасары Мансур хәзрәт Җәләлетдинов балалар өчен телне өйрәнүгә кызыксыну тудыру өчен чараларны һәм мөмкинлекләрне көчәйтергә кирәклегенә басым ясады. “Хәзерге балаларны китапка тартырга кирәк. Алар телефонда мультфильмнар, видеороликлар карап утыра. Татар телле контентны үстерүгә үз өлешебезне кертсәк иде. Бу конкрет тәкъдим”, – диде ул.
Очрашу ахырында Аксакаллар шурасы әгъзалары Татарстан мөфтие Камил хәзрәт Сәмигуллинның татар телен саклау һәм үстерү буенча эшчәнлеген югары бәяләделәр һәм шура исеменнән аны киләсе срокка мөфти итеп сайларга тәкъдим иттеләр.
