Кышкы спорт төрләрендә иң сәләтле якташ кызы­быз, Түбән Новгород өлкәсе Карга – Кочко-Пожар оныгы, Сергачның “Лидер” ФСКсы тәрбияләнүчесе, яшүсмерләр категориясендә үк атак-лы исемгә ирешкән, шорт-трек буенча Россия спорт мастеры Файлә Аймалетдинова илебезнең олы һәм көчле тимераякчылары арасында икенче сезонын үткәрә.

Исегездә булса, ул февраль аенда Бөтенроссия спар­такиада ярышларында алтын һәм көмеш медаль яулады. Яңа сезон да Файлә өчен әлегә уңышлы бара: Уфа, Санкт- Петербург һәм Смоленскта үткән Россия кубогы этапла­рында биш медаль яулады инде – алтын, ике көмеш һәм ике бакыр.

Әмма аның иң зур казанышы Рыбинск шәһәре белән бәйле. Күптән түгел биредә үткән Олимпия уеннары чем­пионы Виктор Ан призларына Бөтенроссия ярышлары нәтиҗәләре буенча, Файлә IV Россия-Кытай яшьләр уен­нарында катнашырга хокук яулады. Якташ кызыбызның карьерасында беренче халыкара стартлар киләсе елның 8-14 январь көннәрендә Южно-Сахалинскта үтәчәк.

Спорт йолдызыбызга бу ярышларда уңышлар, югары нәтиҗәләргә ирешүен телибез. Аның казанышлары турын- да укучыларыбызны газетабыз битләрендә һәм социаль челтәрләрдәге сәхифәләребездә таныштыра торырбыз. Димәк, “Туган як”ны укыгыз, электрон сәхифәләребезне күзәтегез. Нижгар татарлары яңалыклары бары тик бездә.

Илнар САДЕКОВ.

“Туган як”