23 мартта Самараның «Солидарность Арена» стадионында зур ифтар мәҗлесе уздырылды. Тирән мәгънәле һәм күләмле дини чара күпмилләтле төбәгебездә икенче мәртәбә генә уздырылуына карамастан, ислам дине белән ныгытылган төрле милләт халыклары бердәмлеген символлаштырды.
Өлкә Диния нәзарәте инициативасы белән уздырылучы бу ифтар өлкә хөкүмәте һәм милли-мәдәни берләшмәләр ярдәмендә оештырылган иде. Мең ярымга якын кешене җыйган узган елгы чарадан аермалы буларак, быел кунаклар саны азрак иде. Бу, беренчедән, куркынычсызлык мәсьәләсен хәл итү, икенчедән, кунакларга уңайрак шартлар тудыру өчен кирәк иде. Шунысын да билгеләп үтәргә кирәк — быел ифтар кыскарак, ә оештырылуы төгәлрәк булып тоелды. Диодлы экраннарда сәхнәдәге бөтен нәрсә трансляцияләнде, ә бераз соңрак биредә үк Идел буе болгарлары тарихы һәм мөселманнар өчен ураза тотуның әһәмияте турындагы танып-белү фильмнарын күрергә мөмкин булды.
Зал төгәл итеп хатын-кызлар һәм ир-атлар зонасына бүленгән, намаз уку өчен дә урын җитәрлек. Самара мөселманнары уздырган ифтар шатлыгын уртаклашырга күпсанлы мәртәбәле кунаклар да килгән. Алар арасында Россиянең Баш мөфтие, Россия мөселманнарының Үзәк Диния нәзарәте рәисе Тәлгать хәзрәт Таҗетдин, Самара өлкә хөкүмәтенең беренче вице-губернаторы Александр Фетисов, Татарстан Республикасы премьер-министры урынбасары, Бөтендөнья татар конгрессы Милли Шурасы рәисе Васил Шәйхразиев, Татарстан мөфтие Камил Сәмигуллин һәм башкалар…
Чыганак: samtatnews.ru
