Барыбыз да яратып укыган Түбән Новгород өлкәсендә чыгучы “Туган як” газетасының февраль саннарының берсендә агымдагы елны Түбән Новгород өлкәсе бу­енча бөек якташ җырчыбыз Рәшит Ваһапов елы дип игълан итәргә дигән тәкъдимен укыгач, чын күңелдән шатландым, чөнки андый шәхесләр гасырга бер генә туа торгандыр һәм аларны онытырга хакыбыз юк. 2023 елны Ваһапов елы дип игълан итәргә сәбәбе дә җитди – 7 май көнне бөек шәхеснең тууына 115 ел тула.

Аның турында бер хатирә белән бүлешәсем килә. 6 нчымы, 7 нчеме классны тәмамлаган идем. Бу 1956-1957 еллар бул­гандыр. Җәй көнне безнең Печә авылына Рәшит Ваһапов кон­церт белән килде. Иске агач клу­бы бинасы халык белән шыгрым тулды, якындагы күршеләрдән эскәмияләр кертеп тә утырыш­тылар, хәтта тыштан тәрәзә аша караучылар да булды.

Рәшит Ваһаповтан гайре күп еллар аккордеонда уйнап, аның аккомпаниаторы булып торган авылдашыбыз Гани Вәлиев һәм Җәвәһирә Сәлахова да килгән иделәр ул концертка.

Бүгенгедәй күз алдымда – иң беренче сәхнәгә аккордеон то­тып Гани абый чыгып утырды һәм берничә көй уйнады (ул чы­гышы белән Печәдән булганлык­тан, туган тиешле Фәйзрахман ага Бәдретдиновларда туктал­ган да иде, алар гел аралашып-йөрешеп торды). Аннары сәхнәгә Рәшит Ваһапов чыкты, аны ха­лык аягүрә басып, алкышлап каршы алды. Озын буйлы, дул­кынланып торган куе чәчле, кара костюм, ялтырап торган туфли – менә шундый искиткеч матур булып хәтеремә сеңеп калган ул.

Концерт бик озак барды, ул ялгыз да бик күп җырлады, Җәвәһирә белән дуэт булып та берничә җыр башкардылар. Анда бит микрофоннар да юк иде, тере тавыш белән клуб­ны түгел, авылны яңгыратты. “Рамай” җырын башкарганда күзләреннән яшьләр тәгәрәде. Моның сәбәбен күптән түгел “ТНВ-Планета” каналыннан “Умырзая” спектаклен караганда гына белдем – анда әти-әнисе улларын күрергә Казанга килде һәм ул аларны шушы “Рамай”ны җырлап озатты. Бу әти-әнисе белән соңгы күрешүе булган, соңлап белгерткәнгә, әнисен җирләргә дә килеп өлгермәгән. Шуңа да бу җырны күз яшьләрсез башкара алмаган икән.

Үзебезнең авылда җиде еллык мәктәпне тәмамлагач, урта бе­лемне Уразавылда алдым. Класс җитәкчебез Ләйлә Фатеховна Зиннәтуллина иде һәм бервакыт ул безне район мәдәният йорты­на алып барып, аның фойесын­дагы Рәшит Ваһаповка багыш­ланган стенд белән таныштырды, җырчы турында бик күп сөйләде һәм ахырда күз яшен тыялмый­ча бу бөек шәхеснең вафат бул­ганын әйтте. Без дә бик кайгы­рыштык, хәтта еладык та.

Рәшит Ваһаповның биография-сендә безнең Печәгә бәйле өлеше дә бар – ул биредә бер ел мәктәптә укыткан, безнең авыл турындагы китап авторы Үмәр Билялов, күршебездә яшәгән бер әби анарда укыганнарын искә алып сөйлиләр иде.

Халкыбызның шундый бөек улының казанышларын күтәреп чыккан өчен җырчының авыл­дашы, Казанда гомер итүче күренекле якташыбыз Рифат Фәттаховка зур рәхмәт, чөнки ул бу эшне башкармаса, Рәшит Ваһапов та бүтән билгеле шәхесләр кебек югала иде.

Әлбәттә, “Туган як” газетасы редакциясенә дә бөек җырчы турында даими язып торуы, 2023 елны аның елы дип игълан итүе өчен рәхмәтнең олысын җиткерәсем килә.

Ә менә Сергачтагы “Татар ра­диосы” эфирында Ваһаповның җырлары аз яңгырый, бераз күбрәк ишетәсе килә, аның ка­батланмас тавышын бит күпме тыңласаң да, ялыктырмый.

Рәшит Ваһапов турында менә шундый хатирәләр миндә һәм алар белән “Туган як”ны укучы­лар белән дә уртаклашасым килде. Бүтән укучыларның да яз­маларын күрербез дип ышанасы килә, Рәшит Ваһаповка бәйле вакыйгаларны хәтерләүчеләр бардыр әле.

Сания АЛЯУТДИНОВА,

укытучы-ветеран.

Печә,

“Туган як” газетасы

Фотода: Җәвәһирә Сәләхова, Гани Вәлиев, Рәшит Ваһапов, Хәдичә Нуриева.