Татарстан Премьер-министры урынбасары, Милли Шура рәисе Васил Шәйхразиев Южно-Сахалинск шәһәренә визитын тантаналы чарадан башлады. Биредә бүген татар мәдәнияте көннәре ачылды.
Тантаналы чара Сахалин өлкәсенең сәнгать музеенда узды. Васил Шәйхразиев бирегә җыелган милләттәшләребезгә сәламләү сүзләрен җиткерде. Сахалиндагы татарлар гореф-гадәтләрне сакларга, яшьләр күңеленә дә сеңдерергә тырыша. Чарада балалар да шактый иде. Аеруча ир балалар. Аларга татарча көрәш алымнарын да күрсәттеләр.
Татар мәдәниятен ачу тантанасы җыр-биюләр белән үрелеп барды. Биредә “Милләтебез хәзинәләре” дип исемләнгән декоратив-гамәли күргәзмә дә оештырылган. Милли Шура рәисе аның белән дә танышты. Сахалинда татар мәдәнияте көннәре иртәгә дә дәвам итәчәк.
