Идел буе федераль округының татар иҗтимагый оешмалары ак­тивы 10-12 февральдә Саратов­та очрашты. Биредә Бөтендөнья татар конгрессының (БТК) 2021 елдагы эшчәнлегенә йомгак ясалды, агымдагы елга эш пла­ны турында сүз барды. Безнең төбәктән бу җыенда Нижгар татарларының региональ милли-мәдәни автономиясе рәисе Мирзәхләм Абдулгани­ев катнашты һәм без аның белән шул хакта кыскача гына телефон аша сөйләшеп алдык.

Сәфәрем ерак булса да, ан­дагы күргәннәрем күңелемә якын булды. Казаннан әле та­гын 11 сәгать автобус белән барган булсак та, ару-талу сизелмәде, чөнки юлдашларым, белгәнегезчә, фикердәшләрем иде. Һәм безнең уртак төп тема буенча – татар милләтен саклап үстерү турында сөйләшә баргач­тын, ерак юл күзгә дә күренмәде. Анда безне җылы каршы ал­дылар, олы кунак иттеләр. Са­ратов өлкәсендәге сәясәт һәм иҗтимагый мөнәсәбәтләр ми­нистры Наталья ханым Троши­на кайнар сәламләде, җирле милли-мәдәни автономия рәисе Камил әфәнде Аблязов анда­гы милләттәшләребез хакында сөйләде, мөһим эшләре белән таныштырды. БТКның Башкарма комитеты җитәкчесе Данис Шаки­ров төп докладны тотты, аннары Казан белән дә онлайн рәвештә туры элемтәгә чыктык. “Җәлил укулары”, “Идел йорт” төбәкара театр коллективлары конкурс­лары, “Ак калфак” оешмасы эшчәнлеге, “Татарча диктант”, “Татарча КВН” кебек проектлар ту­рында сүз барды.

Саратов өлкәсендә 54 мең та­тар яши һәм без, руслар белән казахлардан кала, халык саны буенча биредә өченче урында торабыз. Шәһәр белән танышып йөргәндә, Советлар Союзы ге­рое Гаяз Рамаев исемен йөрткән татар гимназиясендә булдык, анда 390 бала укый. “Чишмә” ба­лалар бакчасын кереп карадык. Икесендә дә безнең милли рух нык сизелә.

Аннары безне шәһәрдән 30 чакрым ераклыкта булган Усть-Курдюм поселогына алып бар­дылар. Анда “Шиханка тавы” дип йөртелгән һәм урта гасырның мәдәни һәйкәленә караган бо­рынгы каберлекләрне яд иттек. Биредә җирләнгән халыкның 25% татарлар тәшкил итә. Бу җирлекне яңа кулланышка алмакчы булган­нар, ләкин безнең милләттәшләр әлеге изге урынны саклап калган.

Саратовта татарлар белән бәйле урыннар бик күп. Шәһәрнең үзәгендә, мәсәлән, “Татар авы­лы” бар, хәләл кибетләр шак­тый, мәдәни ял итү киңлекләре дә күренә. Ә ел саен өлкә са­бан туе үтә торган 20 гектар­лык мәйданны татар бизнес берләшмәсе бөтенләй үз халкы ихтыяҗына сатып алган. Анда хәзер милли бәйрәмебезне тагын да югарырак һәм сыйфатлырак уздырыр өчен кирәкле корылма­лар, эстрада сәхнәләре, көрәш мәйданы төзелә. Шул ук татар эшмәкәрләре бер ташландык авылны сатып алганнар һәм хәзер шунда инде йөздән артык Чечен җиреннән милләттәшләребез күченеп төпләнгән.

“Алга” спорт комплексы да татар­лар карамагында дисәк, ялгыш булмас. Биредә билбаулар белән шөгыльләнүче тренерлар безнең Зәки абый Валемеевны, дөнья чемпионнарыбызны атап үттеләр.

Саратовның Җәмигъ мәчетен рухи үзәк дип әйтер идем. Анда дин буенча заманча уку-укытуга зур игътибар бирелә, яшьләр белән бу өлкәдә тыгыз эшлиләр. Һәрхәлдә, сәләтле яшьләрне биредә күрә һәм күтәрә беләләр.

Пленар утырышта мин дә сүз тоттым. Үзебезнең төбәк турында, иҗтимагый вә рухи эшчәнлекләребез ха­кында сөйләдем, Саратовта күргәннәремнән һәм ишет- кәннәремнән шаккатканымны ачып салдым, шундый җыен- нарның мөһимлеген ассызыкла­дым һәм оештыручыларга олы рәхмәтләремне әйттем, – дип сөйләде Мирзәхләм Гаяр улы.

Әйе, күп йөргән – күп белгән, ди безнең халык. Шуңа сара- товлыларның уңышлы алымнарын РНКАТНОның яңа рәисе безнең халык файдасына да уңышлы кул­ланыр, дип ышанабыз.

Олег ХӨСӘИНОВ

“Туган як” газетасы